Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 268 Hüküm no: 211 Orijinal metin no: [133-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Nuri Bey’in çocuklarına kalan bahçeli evin satılmasına izin verilmesi Aziz, izin: 1 kıt‘a Numara: 478, 40 guruş Mahmiye-i İstanbul’da Saraçhânebaşı kurbünde Mimâr Ayas mahallesinde sâkin iken bundan akdem vefât eden Mehmed Nuri Bey b. Abdüllatif’in sulbî sagīr oğulları Ahmed Ziyaeddin ve Ali Rıza ve sulbiye sagīre kızı Âişe Münire’nin vâlideleri ve tesviye-i emrlerine bâ-hüccet-i şer‘iye vasîyy-i mansûbeleri olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fatıma Hayriye Hanım bt. Hayri bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan merkūm Hüsam Bey Mescid-i şerîf ve mekteb-i münîf ve hayrât-ı sâiresi vakfı müsakkafâtından mahalle-i mezkûrede Sepetçiler caddesinde vâki‘ ma‘lûmü’l-hudûd ve’l-müştemilât on dokuz numara ile murakkam şehriye doksan akçe icâre-i müeccelelü ma‘a bağçe bir bâb menzilin nısf hisse-i şâyi‘ası müteveffâ-yı mûmâ-ileyhin hayatında bâ-sened-i hâkānî bi’l-icâreteyn taht-ı tasarrufunda olup ba‘de vefâtihî sıgār-ı mûmâ-ileyhim hasbe’l-âde islâsen intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip bekāsı sıgār-ı mûmâ-ileyhim haklarında muzır ve gayr-ı müfîd olduğundan mâ‘adâ sıgār-ı mûmâ-ileyhimin pederleri müteveffâ-yı mûmâ-ileyhden mevrûs mâlları kalîl olup nafaka ve kisveye şiddet-i ihtiyâçları olmağla sıgār-ı mûmâ-ileyhimin menzil-i mezkûrda olan nısf hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sıgār-ı mûmâ-ileyhim haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sıgār-ı mûmâ-ileyhimin menzil-i mezkûrda olan nısf hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla sekiz bin guruş mukābelesinde âhara ferâğa izin taleb şüd. Fî 29 Receb sene [1]301 Şühûdü’l-hâl: Mehmed Emin Ağa b. Mustafa, Muhzırbaşı Ömer Ağa b. Abdulkadir ve gayruhum.