Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 269 Hüküm no: 212 Orijinal metin no: [134-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Efendi’nin Aleksandros’dan aldığı borca karşılık evini vefâen sattığı Hocazâde Ali Rıza, nasb-ı vekîl Numara: 480, 370 guruş İstanbul’da Çenberlitaş civârında Dizdâriye mahallesinde sâkin sâbık Edirne vilâyeti İstînâf Müdde‘î-i Umûmîsi izzetlü Mahmud Efendi b. Mustafa Naim teba‘a-i Devlet-i aliyyenin Rum milletinden işbu bâ‘isü’r-rakīm Edirneli Tüccâr Aleksandros İsvanidi mahzarında ikrâr ve takrîr-i kelâm edüp merkūm Aleksandros işbu sene-i mübâreke Recebi’l-ferd’inin yirmi sekizinci günü ve üç yüz sene-i rûmîsi Mayısının on ikinci günü târihleriyle mâlından bana üç yüz yetmiş dört aded lira-yı Osmânî idâne ve teslîm eylediğinde ben dahi yedinden istidâne ve kabz edüp zimmetimde sahîhan deynim olmağla mukābelesinde Haremeynü’ş-şerîfeyn vakfı müsakkafâtından mahalle-i mezkûrede vâki‘ ma‘lûmü’l-hudûd ve’l-müştemilât şehriye yirmi akçe icâre-i müeccelelü mutasarrıf olduğum bir bâb menzilimi merkūm Aleksandros’a vefâen ferâğ ve tefvîz eylediğimde ol dahi ber-vech-i muharrer tefevvüz ve kabûl edüp ol-vechile temessükü tahşiye ve temhîr olunmuş idi. El-hâletü hâzihî eğer ben deynim olan meblağ-ı merkūm üç yüz yetmiş dört aded lira-yı Osmânî’yi târih-i merkūmdan iki sene tamamına değin edâ edemez isem menzil-i mezkûru bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzundan deyn-i meblağ-ı merkūmu ba‘de’l-edâ fazla kalır ise fazlasını bana def‘ ü teslîme küllemâ azeltüke fe-ente vekîli mefhûmu üzere azl ve in‘izâlden masûne vekâlet-i devriye-i sahîha-i şer‘iye ile tarafımdan el-yevm Edirne’de sâkin Bakkālbaşı Yorgi v. Yamandi’yi gıyâbında kabûlüne mevkūfe vekîl nasb ü ta‘yîn eyledim deyü mûmâ-ileyh Mahmud Efendi’nin bi’l-cümle takrîr-i meşrûhunu merkūm Aleksandros tasdîk etmeğin mâ-vaka‘a bi’t-taleb ketb olundu. Fî 29 Receb sene [1]301 Şühûdü’l-hâl: Muhzır Mehmed Ağa b. Mustafa, Muhzır Ömer Ağa b. Abdulkadir ve gayruhum.