Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 124 Hüküm no: 55 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. David v. Oraha’nın, Mahmud b. Mehmed’e öküz bahasından borçlu olduğu Sürekçi tâifesinden bâ‘isü’l-kitâb Mahmud b. Mehmed nâm kimesne meclis-i şer‘-i şerîfde Yahud kasablarından David v. Oraha nâm Yahudi muvâcehesinde üzerine da‘vâ ve takrîr-i kelâm edip mukaddemâ merkūm David’e her re’si yedişer buçuk esedî guruşa olmak üzre altmış re’s bakarı dört yüz elli esedî guruşa bey‘ ve teslîm ol dahi iştirâ ve kabûl eyledikden sonra semenleri olan meblağ-ı mezbûrun bundan akdem yüz doksan yedi esedî guruşunu yedinden ahz u kabz edip bâkī iki yüz elli üç esedî guruşu zimmetinde kalmışidi suâl olunup meblağ-ı bâkī iki yüz elli üç guruşun merkūm Yahudi’den alıverilmesi matlûbumdur dedikde gıbbe’s-suâl merkūm Yahudi vech-i meşrûh üzre müdde‘î-i merkūm Mahmud’a zikr olunan bakarlar semenlerinden bâkī zimmetinde lâzımü’l-edâ iki yüz elli üç esedî guruş deyni olduğunu bi tav‘ihî ikrâr ve i‘tirâf etmeğin mûcebince meblağ-ı bâkī-i mezbûru müdde‘î-i merkūma edâ ve teslîm merkūm David Yahudi’ye tenbîh olunup mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilâhir li sene [10]77. Şuhûdü’l-hâl: Es-Seyyid Mehmed Çelebi b. es-Seyyid Hüseyin, Muharrem Çavuş b. Abdullah el-Mübâşir, Ali Bey b. ( ), Ali Ağa b. ( ), İbrahim Çelebi b. Ahmed.