Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 125 Hüküm no: 56 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Behram b. İbrahim’in terekesinin vârislerce paylaşılması Fi’l-asl vilâyet-i Anadolu’da Medîne-i Kayseriye’de vâki‘ kale dâhili sükkânından olup mahrûse-i Galata’ya tâbi‘ kasaba-i Tophâne’de Çukur Câmi‘i mahallesinde mütemekkin iken bundan akdem vefât eden Behram b. İbrahim nâm kimesnenin verâseti zevce-i metrûkesi Fâtıma bt. Sefer’e ve sulbiye sagīre kızı Âişe’ye ve anası diğer Âişe bt. Mehmed’e ve li ebeveyn er karındaşı olup zikr olunan kale dâhilinde sâkin Süleyman b. İbrahim’e ve li ebeveyn kız karındaşı Sultan bt. İbrahim’e münhasıra olup kable’l-kısme merkūme Fâtıma dahi fevt olup verâseti sadriye kızı mezbûre Âişe’ye ve vâlidesi Ümmühâni bt. Abdullah ile babası Sefer’e münhasıra olup kable’l-kısme sagīre-i mezbûre Âişe dahi fevt olup verâseti anasının anası mezbûre Ümmühâni ile babasının anası mezbûre diğer Âişe’ye li ebeveyn ammi merkūm Süleyman’a münhasıra olup bi tarîki’l-münâsaha tashîh-i mes’eleleri beş yüz yetmiş altı sehimden olup yirmi dört sehmi mezbûr Sefer’e ve otuz dokuz sehmi mezbûre Ümmühâni’ye ve yüz yirmi üç sehmi babasının anası mezbûre diğer Âişe’ye ve üç yüz elli sehmi mezbûr Süleyman’a ve kırk sehmi mezbûre Sultan’a isâbet ettiği şer‘an sâbit ve mütehakkik oldukdan sonra mezbûr Süleyman tarafından husûs-ı âti’l-beyâna vekîl olduğu hasm-ı câhid-i şer‘-i mahzarında sâbit olan Ahmed Ağa b. Osman nâm kimesne ve mezbûre Âişe bt. Mehmed ve merkūme Sultan bt. İbrahim nâm hâtunlar meclis-i şer‘-i şerîfde Sefer b. Abdullah nâm kimesne mahzarında her biri ikrâr ve takrîr-i kelâm edip müteveffâ-yı mezbûr Behram’ın ve müteveffât-ı mezbûre Fâtıma’nın terekelerinden mahalle-i mezbûrede vâki‘ bir tarafdan Bayram nâm kimesne mülkü ve bir tarafdan ba‘zen Saraylı Hâtun mülkü ve ba‘zen Murtaza Dede mülkü ve bir tarafdan el-Hâc Kadri tasarrufunda olan vakıf menzil ve bir tarafdan tarîk-i âm ile mahdûd olup iki bâb fevkānî oda ve bir bâb tahtânî odamı ve bir sofa ve bi’r-i mâ ve kenîfi ve tûlen otuz ve arzen sekiz zirâ‘ arsayı müştemil mülk menzilden bize isâbet eden beş yüz on üç sehim hisse-i şâyi‘amızı mezbûr Sefer’e on iki bin yirmi iki nakid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve kabz ve tesellüm eyledikden sonra meblağ-ı mezbûr on iki bin yirmi iki akçeyi yedinden tamâmen ahz u kabz edip menzil-i mezbûrda olan hisse-i şâyi‘amız merkūm Sefer’in mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Hasan b. İbrahim, Mustafa b. Mehmed, Mehmed b. Hasan, üstâd Receb, Süleyman b. Yusuf, Baba Resul.