Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 270 Hüküm no: 213 Orijinal metin no: [134-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haci Vasil’in ölümüyle çocuklarına anneleri Anaştaşya’nın vasi tayini Harameyn-i muhteremeyn Hazînesi’nden mazbût hudâvendigâr-ı esbak cennet-mekân Gāzi Sultan Ahmed Hân-ı evvel -tâbe serâhû- hazretlerinin evkāf-ı şerîfeleri beytü’l-mâl hudûdu dâhilinde Galata’ya muzâfe Beyoğlu’nda Pangaaltı nâm mahâlde Şişli caddesinde kâin doksan yedi numara ile murakkam bir bâb [menzilde] mütemekkin iken bundan akdem fevt olan Devlet-i aliyye teba‘asının Rum milletinden Haci Vasil v. Haci Sava v. Kostandi’nin sulbî sagīr oğulları Haralanbos ve Tanaş ve sulbiye sagīre kızları Kadine ve İsvide ve Antaşya’nın vakt-i rüşd ve sedâdlarına değin babaları müteveffâ-yı merkūmdan mevrûs mâllarını hıfza ve tesviye-i umûrlarına kıbel-i şer‘den bir vasî nasbı lâzım ve mühim olmağın emîne ve müstakīme ve her vechile vesâyet uhdesinden gelmeye kādire idiği zeyl-i vesîkada muharrerü’l-esâmî kimesneler haberleriyle zâhir ve patrikhânesiyle mahallesi tarafından vürûd eden ilmühaberlerden nümâyân olan sıgār-ı merkūmûnun anaları Devlet-i aliyye teba‘asının Rum milleti nisvânından şahsı ta‘rîf-i şer‘î ile mu‘arrefe olan işbu bâ‘isetü’l-vesîka Anaştaşya bt. Tanaş sıgār-ı merkūmûnun vakt-i rüşd ve sedâ[d]larına değin babaları müteveffâ-yı merkūmdan mevrûs mâllarını ve tesviye-i umûrlarına kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eylediğini Mahkeme-i Teftîş Beytü’l-mâl Kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 3 Şa‘bân sene [1]301 Şühûdü’l-hâl: Rum milletinden Mağazacı Yorgi v. Kostandi, Rum milletinden Perdeci Koren v. Bico, Rum milleti muhtârı Haci Yorgi v. İstefan ve gayruhum.