Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 271 Hüküm no: 214 Orijinal metin no: [134-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Nazım Bey’in mutasarrıf olduğu vakıfların tevliyeti için Mehmed Bican Efendi’yi vekil tayini Aziz Efendi, nasb-ı vekîl: 1 kıt‘a Numara: (°), 40 guruş Medîne-i Üsküdar’da İhsaniye mahallesinde sâkin ve zikri âtî vakıfların tevliyetlerinin evlâdiyet ve meşrûtiyet üzere sahîh mutasarrıfı olduğu mahalle-i mezkûre imâm ve muhtârları taraflarından mevrûd bir kıt‘a ilmühaberde beyân olunan Ahmed Nazım Bey b. Hüseyin Paşa medîne-i mezkûrede Selîmiye mahallesinde sâkin Evkāf-ı hümâyûn Evrâk İdâresi ketebesinden işbu bâ‘isü’l-kitâb Mehmed Bîcân Efendi b. Ahmed mahzarında takrîr-i kelâm ve ta‘bîr ani’l-merâm edüp Nezâret-i hümâyûna mülhak evkāfdan İstanbul’da Kadırga limanı kurbünde vâki‘ merhûm Yahya Paşa Mekteb-i şerîfi Vakfı’nın vazîfe-i mu‘ayyene ile evlâdiyet ve meşrûtiyet üzere tevliyetinin üç rub‘ hissesi ve yine Haremeyn-i muhteremeyne tâbi‘ evkāfdan İstanbul’da ve Amid’de kâin Nasuh Paşazâde merhûm Ali Bey Vakfı’nın yevmî on beş akçe vazîfe kezâlik evlâdiyet ve meşrûtiyet üzere tevliyeti benim bâ-berât-ı âlî el-yevm uhdemde olup ancak benim kesret-i iştigālim olduğu cihetle vakfeyn-i mezkûreynin bi’l-cümle umûr-ı lâzımelerini idâre ve müsakkafât ve müstegallâtından vukū‘ bulan ferâğ ve intikālâtını istimâ‘ ve temessükâtını temhîre ve ferâğ ve intikālât ve mahlûlât rüsûmâtından tevliyete âid hissemi ahz ve bana teslîme ve sâl be-sâl lâzım gelen muhâsebelerini rü’yete vakfeyn-i mezkûreyne bir gûnâ müdâhale eder olur ise [135] müdâhale edenler terâfu‘ ve husûmet ve redd-i cevâba ve husûs-ı mezkûr mütevakkıf olduğu umûrun küllîsine tarafımdan mûmâ-ileyh Mehmed Bîcân Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eylediğimde ol dahi vekâlet-i mezkûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 29 Receb sene [1]301 <<Şühûdü’l-hâl: Tüccârdan Abdülaziz Efendi b. Osman, Adliye hademesinden Hasan Ağa b. Mustafa, Ömer Ağa b. Kadri, Mehmed Ağa b. Mustafa>>