Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 272 Hüküm no: 216 Orijinal metin no: [135-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fâtımatü’z-Zehra Hanım’dan kızına kalan evin satılmasına izin verilmesi Nazmi, izin: 1 kıt‘a Numara: 548, 12,5 guruş Mahmiye-i İstanbul’da Yenibahçe kurbünde Molla Ali el-Fenârî mahallesinde sâkine iken bundan akdem vefât eden Fâtımatü’z-zehra Hanım bt. Abdullah’ın sadriye sagīre kızı Sadiye’nin pederi ve velîsi olup mahmûdü’l-hâl idiği ihbâr olunan işbu bâ‘isü’l-kitâb Mustafa Ağa b. İbrahim bi’l-velâye takrîr-i kelâm edüp merhûm Bayram Ağa Vakfı müsakkafâtından mahalle-i mezbûrede Câmi‘-i şerîf sokağında on iki numara ile murakkam ma‘lûmü’l-hudûd ve’l-müştemilât şehriye on beş akçe icâre-i müeccelelü bir bâb menzilin nısf hisse-i şâyi‘ası müteveffât-ı mezbûrenin bâ-sened-i hâkānî bi’l-icâreteyn taht-ı tasarrufunda olup ba‘de vefâtihâ sagīre-i mezbûreye hasbe’l-âde intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisvesine kâfi mâlı olmadığından ve ben dahi mu‘sir ve infâka adîmü’l-iktidâr bulunduğum cihetle sagīre-i mezbûrenin nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin beş yüz guruş mukābelesinde âhara ferâğa izin taleb şüd. Fî 24 Şa‘bân sene [1]301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere veliyy-i mezbûr Mustafa Ağa sagīre-i mezbûrenin menzil-i mezkûrda olan nısf hisse-i şâyi‘ası bedel-i misli idiği mütehakkık olan lira-yı Osmânî yüz guruş hesâbıyla iki bin beş yüz guruş mukābelesinde Abdüllatif Ağa b. Abdürrefik’e ol dahi der‘akab meblağ-ı merkūm mukābelesinde ve veliyy-i mezbûr Mustafa Ağa’ya ba‘de’l-ferâğ veliyy-i mezbûr sagīre-i mezbûrenin mâlından ve li-ecli’l-idâne vasî nasb olunan Abdüllatif Ağa yedinden istidâne ve kabz eylediği lira-yı Osmânî yüz guruş hesâbıyla iki bin beş yüz guruş mukābelesinde sagīre-i mezbûreye vefâen ferâğ edeceğinden ol-vechile ferâğı icrâ ve sened-i hâkānîsi îfâ olunmak üzere işbu mahalle şerh verildi. Fî 24 Şa‘bân sene [1]301