Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 273 Hüküm no: 217 Orijinal metin no: [136-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Nüzhet Efendi’ye ait olan dükkân ve içindeki âletleri emaneten elinde bulunduran Ahmed Âgâh Efendi’nin, vekâleti sebebiyle Âsım Efendi’ye teslim etmesi Ali, vekâlet: 1 kıt‘a Numara: 522, 40 guruş Medîne-i Bağdâd mahallâtından Cedîd Hasan Paşa mahallesinde sâkin sâbık Bağdâd Evkāf Muhâsebecisi sa‘âdetlü Yahya Nüzhet Efendi b. Mahmud b. Mahmud tarafından ber-vech-i âtî vekâlet iddi‘â eden işbu bâ‘isü’l-kitâb Menşe-i Küttâb ketebesinden Âsım Efendi b. Esad b. Abdullah zikri âtî dükkân ve gedik âlâtı hisselerine bi’l-emâne vâzı‘ü’l-yed olan Mühendis Ahmed Âgâh Efendi b. İbrahim mahzarında üzerine da‘vâ ve takrîr-i kelâm edüp Nezâret-i Evkāf-ı hümâyûna mülhak evkāfdan Kemalzâde Rüstempaşa Vakfı müsakkafâtından Üsküdar’da Rum Mehmedpaşa mahallesinde kâin ma‘lûmü’l-hudûd şehriye kırk akçe icâre-i müeccelelü bir bâb sucu dükkânı ve derûnunda mevcûd cennet-mekân Gāzi Sultan Mahmud Hân-ı sânî hazretleri evkāf-ı celîleleri müsakkafâtından berber gediği ta‘bîr olunur icâre-i müeccele-i ma‘lûmelü âlât-ı lâzıme-i ma‘lûmeden her birinin yüz altmış sehm i‘tibârıyla yirmi üç sehm hisse-i şâyi‘aları gāib-i mûmâ-ileyhin bâ-temessük-i mütevellî ve nizâm bi’l-icâreteyn taht-ı tasarrufunda ve mûmâ-ileyh Ahmed Âgâh Efendi hisse-i mezkûrelere gāib-i mûmâ-ileyhin teslîmiyle bi’l-emâne vâzı‘ü’l-yed olup ancak gāib-i mûmâ-ileyh ber-vech-i muharrer mutasarrıf olduğu hisse-i şâyi‘a-i mezkûrelerini mûmâ-ileyhin yedinden nez‘ ü kabza ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedellerini ahz ü kabza ve makbûzum olan meblağ-ı merkūm ile kendisine akār iştirâ ve tefvîze ve husûs-ı mezkûr mütevakkıf olduğu umûrun küllîsine yedimde olup iki yüz doksan dokuz senesi şehr-i Rebî‘ülevvelinin yirmi altıncı günü târihiyle müverraha medîne-i mezkûre nâibi Şerif Paşazâde fazîletlü es-Seyyid Mehmed Esad Beyefendi’nin imzâ ve mutâbık hâtemini hâviye bir kıt‘a vekâlet hücceti ve zahrında muharrer medîne-i mezkûre Bidâyet Mahkemesi’nin memhûr bir kıt‘a mazbatası mûceblerince mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ol dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve bana teslîme mûmâ-ileyh Ahmed Âgâh Efendi’ye tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisse-i şâyi‘a-i mezkûre gāib-i mûmâ-ileyhin ber-vech-i muharrer taht-ı tasarrufunda olup kendisi dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i mezkûrun vekâlet müdde‘âsını inkâr etmekle hüccet ve mazbata-i mezkûreler mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve me‘âli müdde‘î-i mûmâ-ileyhin takrîr-i meşrûhuna muvâfık bulunduğu ve mazbata-i mezkûre dahi hüccet-i mezkûreyi müeyyid ve musaddık olarak tezvîr ve tasnî‘den sâlim idiği münfehim ve Mecelle-i Ahkâm-ı Adliyye’nin 1821’inci mâddesi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebince müdde‘î-i mezbûrun vekâletine ba‘de’l-hükm hisse-i şâyi‘a-i mezkûreden keff-i yed ve vekîl-i mûmâ-ileyh Âsım Efendi’ye teslîme mûmâ-ileyh Ahmed Âgâh Efendi’ye tenbîh olunmağın mâ-vaka‘a bi’t-taleb ketb olundu. Fî 22 Cumâdelâhire sene [1]301 Şühûdü’l-hâl: (°)