Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 274 Hüküm no: 218 Orijinal metin no: [136-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdulkadir Paşa’nın vefatıyla küçük oğluna kalan yanmış ev arsasının satılmasına izin verilmesi Mahmiye-i İstanbul’da Laleli kurbünde Mesih Paşa mahallesinde sâkin iken bundan akdem vefât eden el-Hâc Abdulkadir Paşa b. el-Hâc İsa Efendi’nin sulbî sagīr mahdûmu Ali Rıza Bey’in vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe olan işbu bâ‘isetü’l-kitâb Hâce Hadice Nazperver Hanım bt. Abdullah bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan Sultan Bâyezid Hân-ı Velî Evkāfı mülhakātından merhûme Hadice Hatun’un Câmi‘-i şerîfesi hıdemâtına meşrûta vakfına şehriye otuz akçe ve yine Nezâret-i Evkāf-ı hümâyûna mülhak evkāfdan es-Seyyid İbrahim Ağa Vakfı’na şehriye otuz akçe icâre-i müeccelelü vakfeyn-i mezkûreteyn müsakkafâtından Avrat Pazarı kurbünde Kürkçübaşı Ahmed Şemseddin mahallesinde Yiğit sokağında vâki‘ üç numara [ile] murakkam ma‘lûmü’l-hudûd ve’l-müştemilât bir kıt‘a muhterik menzil arsası müteveffâ-yı müşârün-ileyhin hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî sagīr-i mûmâ-ileyh ile sulbî kebîr mahdûmları Asâkir-i şâhâne binbaşılarından Mehmed Salih Efendi ve Mülâzım Hüseyin beylere hasbe’l-âde islâsen intikāl edüp lâkin arsa-i mezkûre bî-hâsıl ve etrâfını muhît taş duvarları mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mûmâ[ileyh] hakkında muzır ve gayr-ı müfîd olduğundan mâ‘adâ sagīr-i mûmâ-ileyhin arsa-i mezkûrede olan sülüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle ma‘an hıfz olunmak sagīr-i mûmâ-ileyh hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mûmâ-ileyhin [137] sülüs hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin üç yüz otuz dört guruş mukābelesinde âhara ferâğa izin taleb şüd. Fî 13 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.