Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 275 Hüküm no: 219 Orijinal metin no: [137-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Behime Hanım’ın vefatıyla çocuklarına kalan evin satılmasına izin verilmesi Küçük İbrahim, izin: 1 kıt‘a Numara: 515, 25 guruş Mahmiye-i İstanbul’da Kādıçeşmesi kurbünde Müftü Ali mahallesinde sâkine iken bundan akdem vefât eden Emine Behime Hanım bt. Mehmed Said’in sadriye sagīre kızı Emine’nin babası ve velîsi olup mahmûdü’l-hâl idiği bi’l-ihbâr zâhir olan işbu bâ‘isü’l-kitâb İbrahim Efendi b. Ahmed b. Abdullah bi’l-velâye takrîr-i kelâm edüp Nezâret-i Evkāf-ı hümâyûna mülhak evkāfdan İstanbul Ağası esbak el-Hâc Ahmed Ağa’nın eczâ-i şerîfesi vakfı müsakkafâtından mahalle-i mezbûrede Mimâr Çeşmesi caddesinde vâki‘ elli altı numara ile murakkam ma‘lûmü’l-hudûd ve’l-müştemilât beher şehr otuz altı akçe icâre-i müeccelelü bir bâb menzil müteveffât-ı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihâ sagīre-i mezbûre ile sadrî kebîr oğlu Şevki Efendi’ye hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olmağla sagīre-i mezbûrenin menzil-i mezkûrda olan nısf hisse-i şâyi‘ası bedel misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak üzere sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin guruş mukābelesinde âhara ferâğa izin taleb şüd. Fî 11 Şa‘bân sene [1]301 Şühûdü’l-hâl: Mısır Çarşısı’nın balmumcu esnâfından Osman b. Ahmed, Muhzır Mehmed Ağa b. Mustafa ve gayruhum.