Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 276 Hüküm no: 220 Orijinal metin no: [137-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabire Hayriye Hanım’ın vefatıyla çocuklarına kalan evin satılmasına izin verilmesi İbrahim, izin: 1 kıt‘a Numara: 487, 30 guruş Medîne-i Üsküdar’da Arakıyeci Cafer Ağa mahallesinde sâkin iken bundan akdem vefât eden Sabire Hayriye Hanım bt. İsmail’in sadrî sagīr oğlu Mehmed Nuri ve sadriye sagīre kızı Fatma kızı Nafiye’nin pederleri ve velîleri olup mahmûdü’l-hâl idiği ihbâr olunan işbu bâ‘isü’l-kitâb Asâkir-i şâhâne binbaşılarından İsmail Ağa b. Ahmed bi’l-velâye takrîr-i kelâm edüp Nezâret-i Evkāf-ı hümâyûna mülhak evkāfdan mahalle-i mezkûrede câmi‘-i şerîfinde imâm olanlara meşrûta mahalle-i mezbûrede kâin kırk beş numara ile murakkam ma‘lûmü’l-hudûd ve’l-müştemilât şehriye otuz [guruş] icâre-i müeccelelü bir bâb menzil zevcem müteveffâ-yı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olduğu hâlde bin iki yüz seksen üç senesi Şa‘bâni’l-mu‘azzamı’nın on yedinci günü târihinde diğer zevci müteveffâ Ahmed’in firâşından hâsıllar diğer sadrî sagīr oğlu Mustafa Kemal ve sadriye sagīre kızı Zübeyde Fethiye’nin müşterek mâllarından istidâne ve ahz ü kabz eylediği dokuz bin dört yüz kırk guruş mukābelesinde ber-vech-i muharrer mutasarrıfe olduğu menzil-i mezkûru sagīrân-ı mezbûrâna bâ-re’y-i mütevellî vefâen ferâğ ve tefvîz eyledikden sonra sagīrân-ı mezbûrândan Mustafa Kemal’in verâseti vâlidesi mezbûre Sabire Hayriye Hanım ile li-ebeveyn kız karındaşı sagīre-i mezbûre Zübeyde Fethiye ve li-ümmin er karındaşı mezbûr Mehmed Nuri ve li-ümmin kız karındaşı mezbûre Fatıma Naciye’ye münhasıra ve ba‘dehû sagīre-i mezbûre Zübeyde Fethiye dahi [fevt olup] verâseti zevc-i metrûkü Ahmed Efendi b. Hüseyin ile vâlidesi mezbûre Sabire Hayriye Hanım ve sagīrân-ı mezbûrân Mehmed Nuri ve Fatıma Naciye’ye münhasıra olduğu hâlde vefât etmeleriyle meblağ-ı mezkûr dokuz bin dört yüz kırk guruşun zevc-i mezbûr Ahmed Efendi’nin hisse-i irsiyesine isâbet eden üç bin beş yüz kırk guruş medyûne-i mezbûre Sabire Hayriye Hanım’dan hayatında ahz ü kabz eylediğini ben dahi velîleri olduğum sagīrân-ı mezbûrân Mehmed Nuri ve Fatıma Naciye’nin hisse-i irsiyesine isâbet eden üç bin dokuz yüz otuz üç guruşu zevcem müteveffât-ı mezbûrenin terekesinden bi’l-velâye ahz [138] u kabz ederek ve li-ecli’l-idâne zimmetimde olduğunu her birimiz huzûr-ı şer‘de ikrâr ve i‘tirâf ederek menzil-i mezkûru ba‘de’l-fekk ve’t-tahlîs velîleri olduğum sagīrân-ı mezbûrân Mehmed Nuri ve Fatıma Naciye’ye hasbe’l-âde münâsafeten intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olmağla sagīrân-ı mezbûrânın menzil-i mezkûru bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Salim Efendi ile Dokuzuncu Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla altı bin guruş mukābelesinde âhara ferâğa izin taleb şüd. Fî 2 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.