Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 277 Hüküm no: 221 Orijinal metin no: [138-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Saliha Sâniye Hanım’dan çocuklarına kalan ev ve arsanın satılmasına izin verilmesi Küçük İbrahim, izin: 1 kıt‘a Numara: 533, 5 guruş Galata’ya muzâfe kasaba-i Kasımpaşa’da Kulağuz mahallesinde sâkine iken bundan akdem vefât eden Saliha Sâniye Hanım bt. Mahmud b. Mehmed’in sadrî sagīr oğlu Fahreddin Receb’in babası ve velîsi olup mahmûdü’l-hâl idiği bi’l-ihbâr zâhir olan işbu bâ‘isü’l-kitâb Mehmed Ağa b. Receb bi’l-velâye takrîr-i kelâm edüp Hazîne-i Evkāf-ı hümâyûndan mazbût evkāfdan Silivrikapısı dâhilinde kâin merhûm İbrahim Paşa Câmi‘-i şerîfi ve hayrât-ı sâiresi vakfı müsakkafâtından mahmiye-i İstanbul’da Altımermer kurbünde Seydi Ömer mahallesinde Küçük Hamam caddesinde vâki‘ on üç numara ile murakkam şehriye kırk beş akçe icâre-i müeccelelü ma‘lûmü’l-hudûd ve’l-müştemilât bir bâb menzilin sülüs hisse-i şâyi‘ası bâ-temessük ve Hazîne-i Haremeyn-i muhteremeynden mazbût evkāfdan sadr-ı esbak merhûm Bayram Paşa Vakfı müsakkafâtından İstanbul’da Tavukpazarı kurbünde Atik Esir Pazarı aşağısında yirmi numara ile murakkam ma‘lûmü’l-hudûd şehriye doksan akçe icâre-i müeccelelü bir bâb dükkân arsasının dahi kezâlik sülüs hisse-i şâyi‘ası babası müteveffâ-yı mezbûr Mahmud Ağa intikālinden müteveffât-ı mezbûrenin hayatında bi’l-icâreteyn taht-ı tasarrufunda olup ba‘de vefâtihâ sülüs hisse menzil ve sülüs hisse arsa-i mezkûre sagīr-i mezbûr ile sadrî kebîr oğlu İsmail’e münâsafeten intikāl edüp lâkin menzil-i mezkûr ânen fe-ânen müşrif-i harâb olarak ve arsa-i mezkûre dahi bî-hâsıl ve etrâfını muhît taş duvarları münhedim olarak bekāları sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun menzil ve arsa-i mezkûrede olan sülüsden nısf hisseleri bedel-i misilleri ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle ma‘an hıfz olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediyesi taraflarından i‘tâ olunan memhûr iki kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan sülüsden nısf hissesi sîm mecîdiye yirmi guruş hesâbıyla altı yüz altmış yedi guruş ki cem‘an bin buçuk guruş mukābelesinde âhara ferâğa izin taleb şüd. Fî 20 Şa‘bân sene [1]301 Şühûdü’l-hâl: Altımermer’de sâkin yorgancı esnâfından İsmail Ağa b. Ali, Atik Ali Paşa’da sâkin Somuncubaşı Osman Ağa b. Ebûbekir ve gayruhum.