Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 126 Hüküm no: 57 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. İsmail’in evini, Âişe bt. Halil’e sattığı Mahmiye-i İstanbul hısnı ebvâbından Topkapısı dâhilinde Fâtıma Sultan mahallesi sâkinlerinden Mehmed Çelebi b. İsmail nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isetü’l-kitâb Âişe bt. Halil nâm hâtun mahzarında bi’t-tav‘i’s-sâf ikrâr ve i‘tirâf edip akd-i âtînin sudûruna değin yedimde mülküm ve hakkım olup mahalle-i mezbûrede vâki‘ bir tarafdan tarîk-i âm ve bir tarafdan Manas nâm zimmî mülkü ve bir tarafdan Fâtıma Hâtun mülkü ve bir tarafdan âhar mülküm ile mahdûd fevkānî bir bâb oda ve bir sofa ve tahtânî bir bâb oda ve bahçe ve kenîfi müştemil menzilimi cümle tevâbi‘i ve levâhıkı ve kâffe-i hukūk ve merâfıkı ile mezbûre Âişe Hâtun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile on beş bin beş yüz akçeye bey‘ ve teslîm edip ol dahi iştirâ ve tesellüm ettikden sonra semen-i mezbûr on beş bin beş yüz akçeyi yedinden tamâmen ahz u kabz eyledim, min ba‘d menzil-i mahdûd-ı mezbûr mersûme Âişe Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Hüseyin Ağa b. Murad, Halil Ağa b. Receb, Ahmed Ağa b. Mehmed Ağa, Halil b. Osman, Süleyman Çelebi b. Hasan, Mustafa Çelebi b. Ahmed.