Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 283 Hüküm no: 227 Orijinal metin no: [141-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma Feride Hanım’ın vefatıyla çocuklarına kalan ev, bahçe ve dükkânların satılmasına izin verilmesi Nazmi, izin: 1 kıt‘a Numara: 550, 115 guruş Mahmiye-i İstanbul’da Şeyh Ebulvefâ kurbünde Molla Hüsrev mahallesinde sâkine iken bundan akdem vefât eden Esma Feride Hanım bt. Ali Rıza’nın sadrî sagīr mahdûmu Abdülhâdi Bey ve sadriye sagīre kerîmeleri Âişe, Enise ve Fatıma Süeda hanımların babaları ve velîleri olup mahmûdü’l-hâl idiğini bi’l-ihbâr zâhir olan işbu bâ‘isü’l-kitâb Hasan Tayyar Bey b. Ömer bi’l-velâye takrîr-i kelâm edüp Nezâret-i Evkāf-ı hümâyûna mülhak evkāfdan merhûm Pertev Paşa Vakfı mahalle-i mezbûrede kâin elli sekiz ve altmış ve altmış iki numara ile murakkam ma‘lûmü’l-hudûd ve’l-müştemilât şehriye otuz yedi buçuk akçe icâre-i müeccelelü bir bâb menzil ma‘a damlalık bağçe ve tahtında kâin iki bâb dekâkinden her birinin nısf hisse-i şâyi‘aları müteveffât-ı mezbûrenin bâ-temessük-i mütevellî bi’l-icâreteyn taht-ı tasarrufunda olup ba‘de vefâtihâ sıgār-ı mezbûrûna <> islâsen intikāl edüp lâkin menzil ve dekâkin-i mezkûrlar ânen fe-ânen müşrif-i harâb olarak ve ma‘a damlalık bağçe-i mezkûrun dahi etrâfını muhît taş duvarları mürûr-ı ezmine ile telef ve zâyi‘ olacağı zâhir ve bedîdâr olup hâsılı harcına vefâ etmeyip bekāları sıgār-ı mezbûrûn haklarında muzır ve gayr-ı müfîd olmağla sıgār-ı mezbûrûnun nısf hisse-i şâyi‘a-i mezkûrelerini bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffâ-yı mezbûrun defter-i kassâmı zeyline idhâl birle i‘mâl ve istirbâh olunup hâsıl olan nemâsıyla ma‘an hıfz olunmak sıgār-ı mezbûrûn haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sıgār-ı mezbûrûnun nısf hisse-i şâyi‘a-i mezkûrları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi üç bin guruş mukābelesinde bâ-re’y-i mütevellî âhara ferâğa izin taleb şüd. Fî 24 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.