Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 284 Hüküm no: 228 Orijinal metin no: [142-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin Ağa’nın nukud vakfına Hüseyin Hüsnü Efendi’nin mütevelli tayini Hocazâde Ali Rıza, nasb-ı mütevellî Numara: 509, 20 guruş Nezâret-i Evkāf-ı hümâyûna mülhak evkāfdan mahmiye-i İstanbul’da Yenibahçe kurbünde Keçeci Pîrî mahallesi avârızı vakfına ilhâkan eshâb-ı hayrâtdan es-Seyyid Hüseyin Ağa b. Mustafa’nın der-dest olup iki yüz seksen altı senesi Zilhicceti’ş-şerîfesinin yirmi dokuzuncu günü târihiyle müverraha Evkāf-ı hümâyûn müfettişi esbak semâhatlü Şerif Mehmed Efendi’nin imzâ ve hâtemini hâviye bir kıt‘a vakfiye mûcebince sekiz bin guruş nukūdu vakfının bâ-hüccet-i şer‘iye mütevellîsi es-Seyyid İsmail İsmet Efendi b. Mehmed’in bu def‘a taşraya memûr olup zarûrî hizmet-i mezkûreyi rü’yet edemeyeceğinden tevliyet-i mezkûreden bi’r-rızâ keff-i yed eylediği üç yüz senesi Şevvâli’l-mükerreminin yirmi dokuzuncu günü târihiyle memhûr bir kıt‘a senedinden müstebân ve ol-vechile hizmet-i mezkûre mu‘attala kalmağla vakf-ı mezkûrlara bir mütevellî nasbı lâzım ve mühim olmağın emîn ve müstakīm ve her vechile umûr-ı tevliyeti rü’yete muktedir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık ve mahalle-i mezkûre ahâlisinin dahi müstahber bulunan işbu bâ‘isü’l-kitâb Hüseyin Hüsnü Efendi b. Mustafa vakf-ı mezkûrlara kıbel-i şer‘den mütevellî nasb ü ta‘yîn olundukda ol dahi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Şühûdü’l-hâl: Mehmed Ağa b. Mustafa, Mehmed Ağa b. Abdulkadir ve gayruhum.