Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 284 Hüküm no: 229 Orijinal metin no: [142-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esteban v. Semye’nin ölümüyle çocuklarına kalan oturakçı dükkânı âletlerinin satılmasına izin verilmesi Hayri, izin Numara: 578, 3,5 guruş Medîne-i Üsküdar’da İcadiye nâm mahâlde sâkin iken bundan akdem fevt olan Devlet-i aliyye teba‘asının Ermeni milletinden Esteban v. Semye’nin sulbî sagīr oğlu Tersis ve sulbiye sagīre kızı Agadi’nin anaları ve tesviye-i emirlerine bâ-hüccet-i şer‘iye vasîyy-i mansûbeleri şahsı ta‘rîf-i şer‘î ile ma‘rûfe olan işbu bâ‘isü’r-rakīm teba‘a-i devlet-i merkūmeden Anber v. Haçador bi’l-vesâye takrîr-i kelâm edüp mahmiye-i İstanbul’da Bit pazarında Hakkāklar kapısı ittisâlinde kâin kırk altı numara ile murakkam ma‘lûmü’l-hudûd bir bâb oturakçı dükkânı derûnunda mevcûde Haremeyn-i muhteremeyn evkāfı müstegallâtından gedik ta‘bîr olunur şehriye altmış akçe icâre-i müeccelelü âlât-ı lâzıme-i ma‘lûmenin rub‘ hisse-i şâyi‘ası müteveffâ-yı merkūmun anası müteveffât Nazlı bt. Ohannes intikālinden taht-ı tasarrufunda olup ba‘de vefâtihî sagīrân-ı mezbûrân ile sulbiye kebîre kızı Yakut’a islâsen intikāl edüp lâkin gedik-i mezkûrun âlâtı dahi mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīrân-ı merkūmân haklarında muzır ve gayr-ı müfîd olduğundan mâ‘adâ nafaka ve kisveye eşedd-i ihtiyâçları olmağla sagīrân-ı merkūmânın âlât-ı gedik-i mezkûrda olan rub‘dan sülüsân hisse-i şâyi‘alarını bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı merkūmâna her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın âlât-ı gedik-i mezkûrda olan rub‘dan sülüsân hisse-i şâyi‘alarını bundan akdem lede’l-müzâyede ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla altı yüz altmış yedi guruş mukābelesinde âhara ferâğa izin taleb şüd. Fî 24 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.