Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 285 Hüküm no: 230 Orijinal metin no: [142-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hulusi Efendi’nin küçük oğluna kalan arsanın satılmasına izin verilmesi İbrahim, izin: 1 kıt‘a Numara: 580, 36,5 guruş Galata’ya muzâfe kasaba-i Tophâne’de Firuzağa mahallesinde sâkin iken bundan akdem vefât [eden] Hulusi Efendi’nin sulbî sagīr oğlu Besim Bey’in li-eb birâderi ve tesviye-i umûruna bâ-hüccet-i şer‘iye vasîyy-i mansûbu ve işbu bâ‘isü’l-kitâb Asâkir-i şâhâne tabîb kāimmakāmlarından izzetlü Osman Nedim Bey b. el-merhûm Mehmed Hulusi bi’l-vesâye takrîr-i kelâm edüp cennet-mekân Sultan Bâyezid Hân-ı Velî -tâbe serâhû- hazretleri evkāfı müstegallâtından Galata cibâyetine tâbi‘ kasaba-i Beşiktaş’da Teşvikiye mahallesinde kâin Kâğıdhâne caddesinde vâki‘ on yedi numara ile murakkam ma‘lûmü’l-hudûd şehriye on bir ve sülüs akçe icâre-i müeccelelü bir kıt‘a arsanın sülüs hisse-i şâyi‘ası sagīr-i mezbûrun bâ-sened-i hâkānî bi’l-icâreteyn taht-ı tasarrufunda olup lâkin arsa-i mezkûrun etrâfını muhît taş duvarları mürûr-ı ezmine ile telef ve zâyi‘ olacağı zâhir olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun sülüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan bahâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile [143] Dördüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun arsa-i mezkûrede olan sülüs hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan <> sîm mecîdiye yirmi guruş hesâbıyla yedi bin üç yüz otuz üç guruş on dört para mukābelesinde âhara ferâğa izin taleb şüd. Fî 7 Ramazan sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.