Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 286 Hüküm no: 231 Orijinal metin no: [143-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Akif Bey’in vefatıyla çocuklarına kalan arsanın satılmasına izin verilmesi Küçük Hakkı, izin: 1 kıt‘a Numara: 577, 7 guruş Medîne-i Üsküdar’a tâbi‘ Kādı karyesinde Osman Ağa mahallesi hudûdu dâhilinde Haydar Paşa sahrâsı pîşgâhında Yeldeğirmeni nâm mahâlde sâkin iken bundan akdem vefât eden Ahmed Akif Bey b. Mehmed Said’in sulbî sagīr oğulları Mehmed Said ve Ahmed Akif beylerin tesviye-i emirlerine bâ-hüccet-i şer‘iye vasîyy-i mansûbları müteveffâ-yı mûmâ-ileyhin hemşîrezâdesi işbu bâ‘isü’l-kitâb Ahmed Cemil Bey b. Mehmed Macid bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan Dârü’s-saâde Ağası İbrahim Ağa Vakfı müstegallâtından zikr olunan Yeldeğirmeni nâm mahâlde Düzkahve sokağında on altıncı adada vâki‘ otuz altı numara ile murakkam ma‘lûmü’l-hudûd bir kıt‘a harîtada gösterildiği vechile gayri ez-ifrâz terbî‘an bin iki yüz on altı zirâ‘ irâdelü bir kıt‘a arsa sagīrân-ı mezbûrânın bâ-sened-i hâkānî bi’l-icâreteyn münâsafeten taht-ı tasarruflarında olup arsa-i mezkûrenin ...? vergisi ve icâresi olmayıp tediyesi bir haylice mebâliğe muhtâc olarak çend sene dahi ibkā olunur ise bedeli vergi ve icâresine mu‘âdil olmayacağından mâ‘adâ sagīrân-ı mezbûrânın infâka kâfi mâlları olmadığından sagīrân-ı mezbûrânın arsa-i mezkûreden yüz seksen dokuz zirâ‘ mahâlli bi’l-ifrâz bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan ribhiyle infâk ve iksâ olunmak sagīrân-ı mezbûrânın haklarında enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Onuncu Dâire-i Belediye Ser-mühendisliği’nden i‘tâ kılınan memhûr bir kıt‘a tahmîn-i bedel pusulası mantûkunca arsa-i mezkûreden müfrez mahâll-i mezkûr bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan sîm mecîdiye yirmi guruş hesâbıyla iki bin sekiz yüz otuz beş guruş mukābelesinde âhara ferâğa izin taleb şüd. Fî 25 Şa‘bân sene [1]301 Şühûdü’l-hâl: Bayram Ağa b. Abdullah, Ömer Ağa b. Abdulkadir ve gayruhum.