Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 287 Hüküm no: 232 Orijinal metin no: [143-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın vefatıyla çocuğuna kalan gedik âletlerinin satılmasına izin verilmesi Mahmiye-i İstanbul’da Mahmudpaşa Mahallesinde sâkin iken bundan akdem vefât eden Ali Ağa b. Mehmed’in sulbî sagīr oğlu Ahmed Cemal Efendi’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı arzuhâlî-i fetvâpenâhî mu‘âvinlerinden mekremetlü Mehmed Hamdi Efendi b. Mehmed Ali b. Ömer ve kısmet-i askeriye muhzırlarından Mehmed Şevket Efendi b. Ferhad b. Abdullah nâm kimesneler ta‘rîfleriyle mu‘arrefe olan işbu bâ‘isetü’l-kitâb Fâtımatü’z-zehra Hanım bt. Ali bi’l-vesâye takrîr-i kelâm edüp Haremeyn-i muhteremeyn Hazînesi’nden mazbût evkāfdan Ayasofya-i kebîr Câmi‘-i şerîfi Vakfı müsakkafâtından cibâyet-i müşâhere-i Galata hırfet-i attârân Mahmud Paşa caddesinde yüz altmış iki numara ile murakkam ayda yirmi beş akçe ücretli bir bâb attâr dükkânı ve derûnunda mevcûde Hazîne-i Haremeyn-i muhteremeyn Evkāfı müstegallâtından beyne’l-esnâf attâr gediği ta‘bîr olunur yevmî iki akçe icâre-i müeccelelü âlât-ı lâzıme-i ma‘lûme ve yine vakf-ı müşârün-ileyhmüstegallâtından yine dükkân-ı mezkûr derûnunda mevcûde beyne’l-esnâf tekneci gediği ta‘bîr olunur yevmî otuz akçe icâre-i müeccelelü diğer âlât-ı lâzıme-i ma‘lûmeden her biri müstakıllen müteveffâ-yı mezbûrun hayatında bâ-temessük-i mütevellî ve nizâm bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbî kebîr oğlu Mehmed Efendi ve sulbiye kebîre kerîmesi Emine Gülfam Hanım hasbe’l-âde islâsen intikāl edüp lâkin dükkân-ı mezkûr müşrif-i harâb olarak hâsılı harcına vefâ etmeyip dekâkin-i mezkûrînin âlâtları dahi mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāları sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun dükkân-ı âlât-ı gedikeyn-i mezkûreynde olan sülüs hısas-ı şâyi‘a-i mezkûreleri bedel-i misilleri ve mütevellîleri re’yleriyle âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında [144] her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun dükkân ve âlât-ı gedikeyn-i mezkûreynde olan sülüs hısas-ı şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla on yedi bin dört yüz on sekiz guruş mukābelesinde bâ-re’y-i mütevellî âhara ferâğa izin taleb şüd. Fî 25 Şa‘bân sene [1]301 Şühûdü’l-hâl: Muhzır Mehmed Ağa b. Mustafa, Ömer Ağa b. Abdulkadir ve gayruhum.