Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 126 Hüküm no: 58 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacca gidecek olan Mustafa Efendi’nin kendi yerine imamlık ve dersiâmlık yapmak üzere vekil tayini Mahmiye-i İstanbul’da Molla Gürânî mahallesi câmi‘-i şerîfinde vazîfe-i mu‘ayyene ve berât-ı şerîf ile hatîb ve mahmiye-i mezbûrede Debbâğzâde mahallesinde el-Hâc Hasan mescidinde imâm olup merhûm İskender Paşa câmi‘inde ve Bakkalzâde Mehmed Efendi mescidi’nde ders-i âm olan Mustafa Efendi b. Süleyman nâm kimesne meclis-i şer‘-i şerîfde kendi tarafından asîl olup Ak Miski mahallesi imâmı olan Şeyh Yusuf Efendi tarafından ikrâr-ı âti’l-beyânı tasdîka vekîl olan râfi‘ü’l-kitâb Mehmed Efendi b. Mustafa mahzarında ikrâr ve takrîr-i kelâm edip hacc-ı şerîf etmeğe azîmetim olmağla vazîfe-i mu‘ayyenemden yevmî yedi akçe ücret ile imâmet ve hitâbet etmek üzre yerime mezbûr Mehmed Efendi’yi ve yedi akçe ücret ile merhûm-ı mezbûrun câmi‘inde ve Bakkalzâde mescidi’nde mu‘tâd üzre tâlibine ders vermek için yerime mûmâ-ileyh Şeyh Yusuf Efendi’yi vekîl ve menâbıma nâib nasb ve ta‘yîn edip anlar dahi kabûl ve merâsimini edâya ta‘ahhüd eylediler dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sânî min Cumâdelûlâ li sene seb‘a ve seb‘în ve elf. Şuhûdü’l-hâl: Mehmed Efendi b. Murad, Ahmed Efendi b. Ali, Hasan Çelebi b. Mehmed el-Müezzin.