Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 288 Hüküm no: 233 Orijinal metin no: [144-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadeddin Efendi’nin vefatıyla kızına kalan dükkân âletlerinin satılmasına izin verilmesi Kādızâde Mehmed, izin: 2 kıt‘a Numara: 553, 25 guruş Medîne-i hazret-i Ebî Eyyûb el-Ensârî -radiye anhü’l-Bârî- mahallâtından Defterdâr Mahmud Efendi mahallesinde sâkin iken bundan akdem vefât eden Sadeddin Efendi b. el-Hâc Şakir’in sulbiye sagīre kızı Hadice Ni‘metî’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı <> Muhzır Mehmed Ağa b. Hüseyin ve el-Hâc Bekir Ağa b. el-Hâc Şakir nâm kimesneler ta‘rîfleriyle mu‘arrefe olan işbu bâ‘isetü’l-kitâb Fatıma Saadet Hanım bt. Abdullah bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan cennet-mekân merhûm Sultan Mahmud Hân-ı evvel -tâbe serâhû- hazretlerinin vakfı müsakkafâtından mahalle-i mezkûrede İskele caddesinden kâin ma‘lûmü’l-hudûd ve’l-müştemilât şehriye on beş akçe icâre-i müeccelelü yirmi dört numara ile murakkam bir bâb aşçı ve işkenbeci dükkânının nısf hissesi ve dükkân-ı mezkûr derûnunda mevcûde Hazîne-i Haremeyn-i muhteremeyn Evkāfı müsakkafâtından yevmî üç akçe icâre-i müeccelelü gedik ta‘bîr olunur âlât-ı lâzıme-i ma‘lûmenin kezâlik nısf hissesi müteveffâ-yı mezbûrun hayatında bâ-temessük-i mütevellî ve nizâm bi’l-icâreteyn taht-ı tasarrufunda olup ba‘de vefâtihî sagīre-i mezbûre ile diğer zevcesinden mütevellide diğer sulbiye sagīre kızı Fatıma Hikmet’e hasbe’l-âde münâsafeten intikāl edüp lâkin dükkân-ı mezkûr ânen fe-ânen müşrif-i harâb olarak hâsılı harcına vefâ etmeyip âlât-ı gedik-i mezkûr dahi mürûr-ı ezmine ile telef ve zâyi‘ olacağı zâhir ve bedîdâr olup ol-vechile sagīre-i mezbûre Hadice Ni‘metî’nin rub‘ hisselerinin ibkāları hakkında muzır ve gayr-ı müfîd olduğundan mâ‘adâ sagīre-i mezbûre nafaka ve kisveye eşedd-i ihtiyâcı olmağla sagīre-i mezbûrenin rub‘ hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup <> medîne-i mezbûre kādîsı fazîletlü Halil Esedî Efendi [ve] İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûklarınca sagīre-i mezbûre Hadice Ni‘metî’ye dükkân ve âlât-ı gedik-i mezkûrlarda olan rub‘ hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla beş bin guruş mukābelesinde âhara ferâğa izin taleb şüd. Fî 27 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere vasîyy-i mezbûre Fatıma Saadet Hanım sagīre-i mezbûrenin dükkân ve âlât-ı gedik-i mezkûrelerde olan rub‘ hisse-i şâyi‘alarını bedel-i misilleri olduğu mütehakkık olan lira-yı Osmânî yüz guruş hesâbıyla beş bin guruş mukābelesinde Muhzır el-Hâc Kadri Efendi b. Veyis’e ferâğ-ı mu‘teber-i kat‘î ile bâ-re’y-i mütevellî ferâğ ve tefvîz ve kabûl edüp mezbûr el-Hâc Nuri Efendi der-akab hisse-i mezkûr ve bedel-i meblağ-ı mezkûr mukābelesinde vasîyy-i mezbûreye ferâğ-ı mu‘teber-i kat‘î ile ferâğ ve tefvîz ol dahi tefevvüz ve kabûl eyledikden sonra vasîyy-i mezbûre kızı sagīre-i mezbûrenin mâlından ve li-ecli’l-idâne vasî nasb olunan mezbûr el-Hâc Nuri Efendi’ye yedinden istidâne ve kabz ve umûruna sarfla istihlâk eylediği beş bin guruş deyni mukābelesinde kızı sagīre-i mezbûre Hadice Ni‘metî’ye vefâen ferâğ ve tefvîz edeceğinden Defter-i hâkānîde ber-minvâl-i muharrer ferâğları icrâ ve temessükleri temşiyet olunmak üzere işbu mahalle şerh verildi. Fî 27 Şa‘bân sene [1]301