Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 289 Hüküm no: 234 Orijinal metin no: [145-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bamyacızâde İsmail Bey’in vefatıyla oğluna kalan ev ve arsanın satılmasına izin verilmesi Kādızâde Mehmed, izin: 1 kıt‘a Numara: 595, 25 guruş Galata’ya muzâfe kasaba-i Kasımpaşa’da Na‘lıncı el-Hâc Hasan mahallesinde sâkin iken bundan akdem vefât eden Bamyacızâde İsmail Bey b. Hasan’ın sulbî sagīr oğlu Cemal Bey’in vâlidesi ve tesviye-i umûruna bâ-hüccet-i şer‘iye vasîyy-i mansûbesi mu‘arrefetü’z-zât Fatıma Hanım bt. Abdullah’ın hâlâ zevci ve husûs-ı âtîde tarafından vekîl-i müseccel-i şer‘îsi işbu bâ‘isetü’l-kitâb Yusuf Efendi b. Abdullah bi’l-vekâle takrîr-i kelâm edüp Nezâret-i Evkāf-ı hümâyûna mülhak evkāfdan merhûm Na‘lıncı el-Hâc Hasan Efendi Vakfı müsakkafâtından mahalle-i mezbûrede ma‘lûmü’l-hudûd ve’l-müştemilât dört kıt‘a temessük mantûkunca şehriye seksen akçe icâre-i müeccelelü bir bâb menzil ve arsanın rub‘ hissesi âharın ve diğer rub‘ hissesi müteveffâ-yı mezbûr İsmail Bey’in ve nısf hissesi dahi vâlidesi olup kendüden mukaddem vefât eden Fatıma Hanım bt. Abdullah’ın şâyi‘an tasarruflarında olduğu hâlde mezbûre Fatıma Hanım’ın fevtiyle nısf hisse-i mezkûre sadrî oğlu müteveffâ-yı mezbûr İsmail Bey ile sadriye kebîre kızları Âişe ve Hadice hanımlara islâsen ba‘de’l-intikāl mezbûr İsmail Bey’in dahi mu‘ahharan fevtiyle menzil ve arsa-i mezkûrlarda on iki hisse i‘tibârıyla zâten ve intikālen tasarrufunda olan cem‘an beş hisse-i şâyi‘ası sagīr-i mezbûra âdiyen intikāl edüp lâkin menzil-i mezkûr ânen fe-ânen müşrif-i harâb olarak <> arsa-i mezkûrun dahi enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāları sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye eşedd-i ihtiyâcı olmağla sagīr-i mezbûrun menzil ve arsa-i mezkûrede olan nısf hisse-i şâyi‘aları bedel-i misilleriyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Altıncı Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil ve arsa-i mezkûrede olan ber-i‘tibâr-ı merkūm nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin guruş mukābelesinde âhara ferâğa izin taleb şüd. Fî 24 Ramazan sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.