Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 290 Hüküm no: 235 Orijinal metin no: [145-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadeddin Efendi’nin vefatıyla kızına kalan gedik âletlerinin satılmasına izin verilmesi Kādızâde Mehmed, izin Numara: 553, 60 guruş Medîne-i hazret-i Ebî Eyyûb el-Ensârî -radiye anhü’l-Bârî- mahallâtından Defterdâr Mehmed Efendi mahallesinde sâkin iken bundan akdem vefât eden Sadeddin Efendi b. el-Hâc Şakir’in sulbiye sagīre kızı Hadice Ni‘metî’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı Muhzır Mehmed Ağa b. Hüseyin ve el-Hâc Bekir Ağa b. el-hâc Şakir nâm kimesneler ta‘rîfleriyle mu‘arrefe olan işbu bâ‘isetü’l-kitâb Fatıma Saadet Hanım bt. Abdullah bi’l-vesâye takrîr-i kelâm edüp mahmiye-i İstanbul’da Balat kapısı dâhilinde el-Hâc İsa mahallesinde vâki‘ dört numara ile murakkam bir bâb kürkçü dükkânı derûnunda mevcûde Hazîne-i Haremeyn-i muhteremeyn Evkāfı müstegallâtından beyne’l-esnâf gedik ta‘bîr olunur âlât-ı lâzıme-i ma‘lûme müteveffâ-yı mezbûrun hayatında bâ-temessük-i mütevellî [ve] nizâm bi’l-icâreteyn taht-ı tasarrufunda olup ba‘de vefâtihî sagīre-i mezbûre ile zevce-i uhrâsından mütevellide diğer sulbiye sagīre kızı Fatıma Hanım’a hasbe’l-âde münâsafeten intikāl edüp lâkin gedik-i mezkûrun mürûr-ı eyyâm ile âlâtı telef ve zâyi‘ olacağı zâhir ve bedîdâr ve ol-vechile sagīre-i mezbûre Hadice Ni‘metî’nin nısf hissesinin ibkāsı sagīre-i mezbûre hakkında muzır ve gayr-ı müfîd olduğundan mâ‘adâ nafaka ve kisveye eşedd-i ihtiyâcı olmağla sagīre-i mezbûrenin âlât-ı gedik-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre kādîsı fazîletlü Halil Esedî Efendi taraflarından i‘tâ olunan memhûr bir kıt‘a ilmühaberi mantûkunca sagīre-i mezbûrenin âlât-ı gedik-i mezkûrda olan nısf hisse-i şâyi‘ası lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on iki bin guruş bedel mukābelesinde âhara ferâğa izin taleb şüd. Fî 27 Şa‘bân sene [1]301 Şühûdü’l-hâl: Ömer Ağa b. Kadri, Mehmed Ağa b. Mustafa [146] Derûn-ı hüccetde bast ü beyân olunduğu üzere vasîyy-i mezbûre Fatıma Saadet Hanım sagīre-i mezbûrenin gedik-i mezkûrda olan nısf hisse-i şâyi‘asını bedel-i misli olduğu mütehakkık olan lira-yı Osmânî yüz guruş hesâbıyla on iki bin guruş mukābelesinde Muhzır el-Hâc Nuri Efendi b. Veyis’e ferâğ-ı mu‘teber-i kat‘î ile bâ-re’y-i mütevellî <<âhara>> ferâğ ve tefvîz eylediğinde ol dahi der‘akab meblağ-ı mezkûr mukābelesinde vasîyy-i mezbûre sagīre-i mezbûrenin mâlından ve li-ecli’l-idâne vasî nasb olunan mezbûr Nuri Efendi yedinden istidâne ve kabz ve umûruna sarfla istihlâk eylediği on iki bin guruş deyni mukābelesinde kızı sagīre-i mezbûre Hadice Ni‘metî’ye vefâen ferâğ ve tefvîz edeceğinden Defter-i hâkānîde ber-minvâl-i muharrer ferâğ ve temessükünün tahşiyesi içün işbu mahalle şerh verildi.