Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 291 Hüküm no: 236 Orijinal metin no: [146-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayvaz Hararos’un ölümüyle oğluna kalan evin satılmasına izin verilmesi Hayri, izin: kıt‘a Numara: 589, 50 guruş <> Mahrûse-i Galata’ya muzâfe İstinye nâhiyesine tâbi‘ Boyacı karyesinde sâkin iken bundan akdem fevt olan Devlet-i aliyye teba‘asının Ermeni milletinden Ayvaz Hararos v. Ohannes’in sulbî sagīr oğlu Ohannes’in li-ebeveyn ammi ve tesviye-i umûruna bâ-hüccet-i şer‘iye vasîyy-i mansûbu teba‘a ve millet-i merkūmeden işbu bâ‘isü’r-rakīm Odabaşı Kirkor bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan sadrazam-ı esbak merhûm Mustafa Reşid Paşa Vakfı müsakkafâtından karye-i mezkûrede Balta Limanı’nda Fıstıklı caddesinde iki numara ile murakkam ma‘lûmü’l-hudûd <> senevî on beş guruş on altı para icâre-i müeccelelü gayri ez-ifrâz üç yüz sekiz zirâ‘ mukaddemâ arsa el-yevm bir bâb menzil müteveffâ-yı merkūmun sağlığında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i merkūma hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i merkūm hakkında muzır ve gayr-ı müfîd olduğundan mâ‘adâ sagīr-i merkūmun nafaka ve kisveye dahi eşedd-i ihtiyâcı olmağla sagīr-i merkūmun menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i merkūm hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Beşinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i merkūmun menzil-i mezkûrunu bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on bin dört guruş mukābelesinde âhara ferâğa izin taleb şüd. Fî 19 Ramazan sene [1]301 Şühûdü’l-hâl: Hüseyin Ağa b. Abdullah, Ömer Ağa b. Kadri ve gayruhum.