Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 127 Hüküm no: 59 Orijinal metin no: [8b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Himmet b. Mustafa’nın, vasîsi olduğu Hasan’a borçlu olduğu Mahmiye-i İstanbul’da Sarıgerz mahallesinde sâkin iken bundan akdem vefât eden Mehmed b. Mehmed nâm müteveffânın sulbî sagīr oğlu Hasan’ın tesviye-i umûruna kıbel-i şer‘den mansûb vasîsi olan Himmet b. Mustafa üzerine nâzır nasb ve ta‘yîn olunan Hasan b. Himmet nâm kimesne mahfil-i kazâda vasiyy-i mezbûr Himmet mahzarında üzerine da‘vâ ve takrîr-i kelâm edip sagīr-i mezbûrun babasından intikāl eden malından vasiyy-i mezbûr zimmetinde sagīr-i mezbûrun elli esedî guruş hakkı olup meblağ-ı mezbûru nezâretim hasebiyle taleb ederim suâl olunup takrîri tahrîr olunmak murâdımdır dedikde gıbbe’s-suâl vasiyy-i mezbûr Himmet cevâbında fi’l-hakīka vasîsi olduğum Hasan’ın babasından intikāl eden malından elli esedî guruş sagīr-i mezbûr Hasan’a zimmetimde vâcibü’l-edâ ve lâzımü’l-kazâ deynim vardır deyû ikrâr ve i‘tirâf etmeğin mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Abdi Çelebi b. Receb, Şükrullah b. Mustafa, İbrahim b. Ahmed, Hasan Çelebi b. Ahmed.