Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 134 Hüküm no: 71 Orijinal metin no: [10a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Meryem bt. Ali’nin mirasçılarının davalarının sulhle neticelendiği Vilâyet-i Rumeli’nde Premedi kazâsına tâbi‘ Paskal nâm karye sükkânından iken bundan akdem vefât eden Meryem bt. Ali nâm hâtunun verâsetini zevc-i metrûkü Osman b. Timur nâm kimesne ile babası Ali b. Mustafa ve vâlidesi Ruha bt. Abdullah nâm hâtuna münhasıra olduğu şer‘an zâhir ve mütehakkik oldukdan sonra merkūm Ali meclis-i şer‘-i hatîr-i lâzımü’t-tevkīrde kendi tarafından asâleten ve zevcesi merkūme Ruha tarafından husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olmağla vekâleten meclis-i şer‘de tereke-i müteveffât-ı mezbûre vâzı‘ü’l-yed olan zevci merkūm Osman mahzarında ikrâr ve takrîr-i kelâm edip mûrisem müteveffât-ı mezbûreden bana ve zevcem mezbûreye bi’l-irsi’ş-şer‘î isâbet eden terekesi mukābelesinde şerâit-i sıhhat-i sulhü hâvî ve mevâni‘-i müfsideden ârî tehârüc-i şer‘î tarîki üzre tavassut-ı muslihîn ile merkūm Osman benimle bin iki yüz akçe üzerine inşâ-i akd-i sulh ettikde ben dahi asâleten ve vekâleten sulh-i mezbûru kabûl ve bedel-i sulh olan meblağ-ı mezbûr bin iki yüz akçeyi [10b] merkūm Osman yedinden tamâmen ahz u kabz edip ba‘de’l-yevm tereke-i müteveffâ-yı mezbûreye müte‘allika âmme-i de‘âvî ve mütâlebâtdan merkūm Osman’ın zimmetini asâleten ve vekâleten ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Fî gurreti Cemâziyelevvel li sene 1077. Şuhûdü’l-hâl: Sinan Beşe b. Mehmed, Hüseyin Beşe b. Haydar, Oruc b. Ali, Derviş b. Mustafa, Hüseyin Beşe b. Mustafa.