Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 135 Hüküm no: 72 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ali Bey b. Hasan’ın mirasçısı olan kızı Hatice’nin vasîsi Abdullah Efendi ile zevcesi Havva bt. Rıdvan’ın miras taksiminde anlaştıkları Mahmiye-i İstanbul’da Kabasakal Sinan mahallesinde sâkin iken bundan akdem vefât eden Ali Bey b. Hasan nâm kimesnenin verâseti zevce-i metrûkesi Havva bt. Rıdvan nâm hâtuna ve sulbiye kızı Hatice nâm sagīreye ve babası mezbûr Hasan’a münhasıra olup ba‘dehû mezbûr Hasan dahi vefât edip verâseti zevce-i metrûkesi Selime bt. Davud’a ve sulbî kebîr oğlu Hasan’a ve sulbî sagīr oğlu Mehmed’e münhasıra olduğu şer‘an zâhir ve müte‘ayyin oldukdan sonra kendi tarafından asîl ve sadriye kızı sagīre-i mezbûre Hatice’nin kıbel-i şer‘den mansûbe vasîsi olan mezbûr Havva, meclis-i şer‘de sagīre-i mezbûrenin mukaddemâ vasîsi olan işbu sâhibü’l-kitâb Abdullah Efendi b. Mustafa mahzarında asâleten ve vesâyeten ikrâr edip bundan akdem mahmiye-i mezbûrede kassâm-ı askerî olan efendiye tahrîr ettiğimizde nakid ve kıyem-i eşyâ on dört bin iki yüz seksen sekiz akçeye bâliğ oldukdan sonra mezbûr Abdullah Efendi meblağ-ı mezbûrun üç bin yedi yüz kırk sekiz akçesini ma‘rifetimle müteveffâ-yı mezbûr Hasan’ın verese-i mezbûresine ve altı yüz elli akçesini resm-i mer‘â için kassâm-ı mezbûra ve dellâla ve sâir levâzım için verip ve nakid iki bin sekiz yüz doksan iki akçe, dört bin yedi yüz on beş akçe kıymetli eşyâ cem‘an yedi bin altı yüz yedi akçesini kendi mehr-i müeccelim ve sümün hissem ve sagīre-i mezbûrenin hissesiçin ben kabz edip ba‘dehû meblağ-ı mezbûrdan bin sekiz yüz akçesini mezbûr Abdullah Efendi’ye red ve teslîm eylediğimden sonra sagīre-i mezbûrenin hissesinden merkūm Abdullah Efendi yedinden dört bin seksen üç akçe bâkī kaldıkda mezbûr Abdullah vesâyet-i mezbûreden azl olunmağla meblağ-ı mezbûrun dört bin akçesini bana def‘ ve teslîm ben dahi sagīre-i mezbûre için bi’l-vesâye kabz ve tesellüm edip ve seksen üç akçesi sagīre-i mezbûre için aldığı hüccet-i lâzıme için harcına tutulmağın sagīre-i mezbûrenin ve benim hakkımdan mezbûr Abdullah Efendi yedinde bir akçe bâkī kalmadı, ba‘de’l-yevm mezbûr ile kat‘â da‘vâ ve husûmetim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Rebî‘ilâhir sene [10]77. Şuhûdü’l-hâl: Mahmud Efendi b. Receb, Mustafa Efendi b. Muharrem, Mustafa Çavuş b. Sinan, Şeyh İvaz Efendi b. İshak, Musa Efendi b. Davud, Mehmed Efendi b. Ahmed, Şaban Ağa b. Süleyman, Ahmed Ağa b. Süleyman, Hasan Çelebi b. Abdullah, Mehmed b. Mustafa, Sâlih b. Abdullah, Hacı Nimetullah Efendi.