Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 136 Hüküm no: 74 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Hüseyin’in, evini Hasan Efendi b. Mustafa’ya sattığı Dârü’l-hilâfeti’l-aliyye Kostantıniyye el-mahmiyye mahallâtından Kâtib Muslihiddin mahallesi sâkinelerinden Fâtıma Hâtun bt. Hüseyin tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olup mahmiye-i mezbûrede Fethiye câmi‘-i şerîfi müezzini olan Mehmed Halîfe b. Abdünnebi ve Derviş Ali mahallesi sâkinlerinden İbrahim Çelebi b. Ahmed nâm kimesneler şehâdetleriyle şer‘an sâbit olan Mehmed Ağa b. Ahmed nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu bâ‘isü’l-kitâb umdetü kuzâti’l-İslâm zübdetü vülâti’l-enâm Hasan Efendi b. Mustafa nâm kimesne mahzarında ikrâr ve takrîr-i kelâm edip müvekkile-i mezbûre Fâtıma Hâtun bey‘-i âti’z-zikr sudûruna değin yedinde mülkü ve hakkı olup mahmiye-i mezbûrede Yenibahçe kurbunda Karabaş mahallesinde vâki‘ bir tarafdan suyolcu el-Hâc Abbas menzili ve bir tarafdan Payidar nâm hâtun menzili ve ba‘zen el-Hâc Osman vakfı ve ba‘zen merkūm suyolcu el-Hâc Abbas menzili ve bir tarafdan Fershan nâm hâtun men[zili] ve bir tarafdan tarîk-i âm ile mahdûd fevkānî üç bâb oda ve iki sofa ve tahtânî bir bâb oda ve bir matbah ve bir kenîf ve hadîka ve iki su kuyusu ve havluyu müştemil menzilini bi cümleti’t-tevâbi‘ tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile dört yüz yirmi beş kıt‘a esedî guruşa Hasan Efendi’ye bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ dört yüz yirmi beş kıt‘a esedî guruşu mûmâ-ileyh Hasan Efendi yedinden tamâmen alıp kabz eyledim, menzil-i mahdûd mezbûr müşârün-ileyh Hasan Efendi’nin mülk-i müşterâsı olmuşdur, keyfe mâ yeşâ’ ve yahtâr mutasarrıf ol[sun] dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel sene [107]7. Şuhûdü’l-hâl: Mehmed Ağa b. Osman, Şaban Efendi b. Receb El-İmâm, Ahmed Efendi b. Mehmed, Solak Mehmed Bey b. Mustafa, Muharrem Çelebi b. ( ).