Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 138 Hüküm no: 77 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hatun bt. Abdullah’ın, evini vakfedip Halil Efendi b. Cafer’i mütevelli tayin ettiği Mahmiye-i İstanbul’da Sultan Bayezid-i Cedîd mahallesi sâkinelerinden fahrü’l-muhadderât Belkıs Hâtun bt. Abdullah meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu bâ‘isü’l-kitâb Kayyım Halil Efendi b. Cafer nâm kimesne mahzarında ikrâr ve takrîr-i kelâm edip süknâ ve galle ve tevliyyet ve tasarrufu evvelâ kendi nefsime vefâtımdan sonra mahalle-i mezbûre müezzini Mustafa Efendi b. Kasım’a ba‘dehû mezbûr Mustafa Efendi’nin batnen ba‘de batnin karnen ba‘de karnin evlâdına ve evlâd u evlâdına ba‘de’l-inkırâz mahrûse-i Galata’ya tâbi‘ kasaba-i Beşiktaş’da vâki‘ Hanım Hâtun mescid-i şerîfi’nde müezzin olanlara her Cum‘a gecesi huzûrunda bir Yâsin-i şerîf ve bir Fâtiha-i şerîfe okuyup sevâbını rûhuma ihdâ etmek üzre meşrût vakfım olup mahalle-i mezbûrda vâki‘ bir tarafdan ba‘zen Receb Ağa bahçesi ve ba‘zen Mahmud Ağa bahçesi ve bir tarafdan İskender Paşa veresesi mülkleri ve bir tarafdan ba‘zen Fâtıma Hâtun ve ba‘zen Mısrî Çavuş mülkleri ve bir tarafdan tarîk-i hâs ile mahdûd menzilin umûr-ı tevliyyetini görmeğe tarafımdan mezbûr Halil Efendi’yi vekîl ve menâbıma nâib nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i tevliyyet-i mezkûreyi edâya ta‘ahhüd etmeğin mâ hüve’l-vâki‘ bi’t-taleb ketb olundu. Fî gurreti Cumâdelûlâ li sene seb‘a ve seb‘în ve elf. Şuhûdü’l-hâl: Mehmed Efendi el-İmâm, Hasan Efendi el-Müezzin, Mehmed Çelebi b. Ahmed, Mustafa Çelebi b. Mehmed, Osman Bey b. Mehmed, Mustafa Beşe b. Abdullah, Gergerlioğlu Mustafa Ağa.