Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 138 Hüküm no: 78 Orijinal metin no: [11a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hatun bt. Abdullah’ın büyük yangında yanan vakıf ev yeri arsasını kiraladığı Mahmiye-i İstanbul’da Sultan Bayezid-i Cedîd mahallesi sâkinelerinden fahrü’l-muhadderât Belkıs Hâtun bt. Abdullah meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu bâ‘iseyi’l-kitâb Kasab Mehmed Beşe b. Abdullah ile zevce-i menkûhası Rahime Hâtun bt. Abdullah mahzarlarında ikrâr ve takrîr-i kelâm edip süknâ ve galle ve tevliyyet ve tasarrufu evvelâ kendi nefsime vefâtımdan sonra mahalle-i mezbûre müezzini Mustafa Efendi b. Kasım’a ba‘dehû mezbûra Mustafa Efendi’nin batnen ba‘de batnin karnen ba‘de karnin evlâdına ve evlâd u evlâdına ba‘de’l-inkırâz mahrûse-i Galata’ya tâbi‘ kasaba-i Beşiktaş’da vâki‘ Hanım Hâtun mescid-i şerîfi’nde müezzin olanlara her Cum‘a gecesi huzûrunda bir Yâsin-i şerîf ve bir Fâtiha-i şerîfe okuyup sevâbını rûhuma ihdâ etmek üzre meşrût vakfım olup mahalle-i mezbûrede vâki‘ bir tarafdan ba‘zen Receb Ağa bahçesi ve ba‘zen Mahmud Ağa bahçesi ve bir tarafdan İskender Paşa veresesi mülkleri ve bir tarafdan ba‘zen Fâtıma Hâtun ve ba‘zen Mısrî Çavuş mülkleri ve bir tarafdan tarîk-i hâs ile mahdûd menzil bin yetmiş senesinde vâki‘ harîk-i azîmde bi’l-külliye muhterik olup arsa-i sırfa kaldıkdan sonra üzerine binâya kudretim olmamağla nice müddet şöyle hâliye ve mu‘attala kaldıkda tevliyyet-i mahkiyem hasebiyle arsa-i menzil-i mahdûd-ı mezbûru icâre-i müeccele ve üzerine edeceği binâ mu‘accelesine mahsûb olmak üzre tâlibine arz eylediğimde vech-i muharrer üzre icâre-i müeccele ve üzerine edeceği binâ mu‘accelesine mahsûb olmak üzre istîcâra tâlib bulunmayıp ayda on akçe icâre-i müeccele ve üzerine edeceği binâ mülkü olmak üzre tevliyyetim hasebiyle izin vermek üzre tâlibine arz eylediğimde mezbûr kasab Mehmed Beşe ile zevcesi mezbûre Rahime tâlibler olmağın arsa-i menzil-i mahdûd-ı mezkûru bin yetmiş dört şehr-i Rebî‘ulâhiri gurresinde elli beş kıt‘a esedî guruş icâre-i mu‘accele ve ayda on akçe icâre-i müeccele ile mezbûrân [11b] kasab Mehmed Beşe ve Rahime Hâtun’a ale’l-iştirâki’s-seviy îcâr ve teslîm edip anlar dahi istîcâr ve kabz ettiklerinden sonra mu‘accele-i mezbûre elli beş kıt‘a esedî guruşu tamâmen yedlerinden alıp kabz edip kendi malları ile mülkleri olmak üzre üzerine binâya mezbûrân kasab Mehmed Beşe ve Rahime’ye izin vermiş idim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cumâdelûlâ li sene seb‘a ve seb‘în ve elf Şuhûdü’l-hâl: Es-Sâbikūn, es-Sâbikūn, es-Sâbikūn