Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 140 Hüküm no: 81 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marat v. Maldar’ın, evini oğlu Serkis’e sattığı Mahmiye-i İstanbul’da Büyük Langa kurbunda Çakır Ağa mahallesinde mütemekkin Marat v. Maldar nâm Ermeni mahfil-i kazâda sulbî kebîr oğlu hâmilü’r-rakīm Serkis nâm [zimmî] muvâcehesinde ikrâr ve takrîr-i kelâm edip akd-i âtî sudûruna değin yedimde mülküm ve hakkım olup mahalle-i mezbûrede vâki‘ bir tarafdan Bogos nâm Ermeni mülkü ve bir tarafdan Rali nâm nasrânî mülkü ve bir tarafdan tarîk-i âm ile mahdûd bir bâb fevkānî oda ve bir sofa ve bir tahtânî oda ve bir sofa ve bir tahtânî oda ve bir sofa ve merkūm Rali ile müşterek su kuyusu ve kenîf ve havluyu müştemil menzilimi cümle tevâbi‘i ve levâhıkı ile oğlum mezkûr Serkis’e üç yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûr üç yüz kıt‘a esedî guruşu merkūm Serkis yedinden tamâmen ahz u kabz eyledim ba‘de’l-yevm mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-hâmis min Cumâdelûlâ li sene seb‘a ve seb‘în ve elf. Şuhûdü’l-hâl: Üstâd İsa Berber, Berber Ahmed Çelebi b. İbrahim, Berber Şaban Beşe, Abdullah Efendi, Hüseyin Beşe Langalı.