Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 141 Hüküm no: 82 Orijinal metin no: [11b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın Mehmed b. Hüseyin’den muhâlaa yoluyla boşandığı Medîne-i Hazret-i Ebî Eyyûb-i Ensârî mahallâtından Davud Ağa mahallesi sâkinelerinden Fâtıma bt. Mustafa nâm hâtun mahfil-i kazâda zevci bâ‘isü’l-kitâb Mehmed b. Hüseyin mahzarında ikrâr ve takrîr-i kelâm edip zevcim mezbûr Mehmed zimmetinde ma‘kūdun-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre ve mezbûr Mehmed’in firâşından mütevellid[e] olan Hâmide nâm sagīreyi yedi yaşın tekmîl edince kendi malından infâk ve iksâ etmek üzre muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîk mâ vaka‘a bi’t-taleb ketb olundu. Fi’s-sâmin [min] Cumâdelûlâ li sene seb‘a ve seb‘în ve elf Şuhûdü’l-hâl: Mahmud b. Mustafa, Veli Bey b. ( ), Mehmed Bey b. ( ), Mustafa Çelebi b. ( ), Veli b. Mahmud.