Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 142 Hüküm no: 84 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmügülsüm bt. Himmet’in vârisi olduğu Sitti bt. Mahmud’un eşyalarına komşularınca el konulduğu iddiasını ispatlayamadığı Mahmiye-i İstanbul’da Mahmud Paşa mahallesinde çâşnigir odalarından birinde sâkine iken bundan akdem vefât eden Sitti bt. Mahmud nâm hâtunun zât-ı rahm cihetinden hasren vârisi olan Ümmügülsüm bt. Himmet nâm hâtun meclis-i şer‘-i hatîr-i lâzımü’t-tevkīrde zikr olunan odalarda sâkinler olan ashâb-ı hâze’l-kitâb Mustafa b. Yusuf nâm kimesne ile mezbûrun zevcesi Fâtıma bt. İlyas ve kızı Âişe bt. Mehmed nâm hâtunlar mahzarlarında üzerlerine da‘vâ ve takrîr-i kelâm edip bundan akdem mûrisem mezbûre Sitti ol odada fevt oldukda yanında mevcûd terekesinden seksen aded şerîfî altını ve yetmiş kıt‘a esedî guruş ile bir münakkaş iskarlet zenne ferâce ve bir sîm kuşak ve iki top ma‘lûmetü’l-cins ve’z-zirâ‘ kumaşı ve bir mâî atlas kaftanı ve iki kebîr tencere ve iki çuka yastık ve bir sîm ön kuşak bu cümle zikr olunan eşyâyı mezbûrlar ahz ve ihfâ etmeğin suâl olunup mârrü’z-zikr altın ve guruş ve eşyânın alıverilmesi matlûbumdur dedikde gıbbe’s-suâl mezbûrlardan her biri cevâbında husûs-ı mezbûru bi’l-külliye inkâr edicek müdde‘iyye-i mezbûre Ümmügülsüm’den müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmekle mezbûrdan Mustafa ve Fâtıma ve Âişe’den her birine fi’l-vâki‘ müteveffât-ı mezbûrenin terekesinden sâlifü’z-zikr seksen aded şerîfî altın ve yetmiş kıt‘a esedî guruşu ve eşyâyı ahz ve ihfâ etmediklerine yemîn teklîf olundukda anlar dahi alâ vefki’l-mes’ûl yemîn billâhi’l-aliyyi’l-azîm etmeğin mûcebiyle müdde‘iyye-i mezbûre Ümmügülsüm mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-hâmis min Cumâdelûlâ li sene seb‘a ve seb‘în ve elf Şuhûdü’l-hâl: Fahrü’l-akrân Şaban Ağa Ser-muhzırân, Mehmed Çelebi b. Abdurrahman, İbrahim Çelebi b. Mehmed, Mehmed Beşe b. Ali Çukadâr, Yusuf Beşe b. Abdullah