Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 142 Hüküm no: 85 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kerime bt. Ali Bey’in terekesinin vârisler arasında paylaşıldığı Mahmiye-i İstanbul’da Şeyh Muhyiddin Kocavî mahallesi ahâlîsinden olup tarîk-i hacc-ı şerîfde vefât eden Kerime bt. Ali Bey’in verâseti zevc-i metrûkü el-Hâc Mehmed b. Hoca Maksud ile vâlidesi Rahime’nin li ebeveyn kız karındaşı ve zî-rahm cihetinden vârisesi Eşme Hâtun bt. Ali Bey’e münhasıra olduğu şer‘an mütehakkik oldukdan sonra merkūme Eşme Hâtun meclis-i şer‘-i şerîf-i lâzımü’t-teşrîfde tereke-i müteveffât-ı mezbûreye vâzı‘ü’l-yed olan işbu bâ‘isü’l-kitâb mezbûr el-Hâc Mehmed mahzarında bi’t-tav‘i’s-sâf ikrâr ve i‘tirâf edip tereke-i müteveffât-ı mezbûreden bana isâbet eden hisse-i irsiyye-i şer‘iyyem mukābelesinde merkūm el-Hâc Mehmed ile şerâit-i sıhhat-i sulhü hâvî mevâni‘-i müfsideden ârî bi tarîki’t-tehârüci’ş-şer‘î kırk beş kıt‘a esedî guruş üzerine sulh olup bedel-i sulh olan meblağ-ı mezkûr kırk beş kıt‘a esedî guruşu tamâmen yedinden ahz u kabz edip tereke-i müteveffât-ı mezbûreye müte‘allika âmme-i de‘âvî ve mütâlebâtdan merkūm el-Hâc Mehmed’i ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene 1077. Şuhûdü’l-hâl: Hasan Hoca b. Mustafa el-Müezzin, el-Hâc Hasan b. Mirza, Ali Beşe b. Mirza, navulcu Nasuh Beşe, Navulcu Hüseyin Beşe.