Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 147 Hüküm no: 94 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Beşe b. Mehmed’in câriye bahasından Mehmed b. Ahmed’den alacaklı olduğu Mahmiye-i İstanbul’da Keçeci Pîrî mahallesinde sâkin işbu bâ‘isü’l-kitâb Veli Beşe b. Mehmed nâm kimesne mahfil-i kazâda Mehmed b. Ahmed nâm kimesne mahzarında üzerine da‘vâ ve takrîr-i kelâm edip gāibe [ani’l-]meclis Sâliha nâm hâtun zimmetinde yedimden müşterâ ve makbûz evsâfı beynimizde ma‘lûm Rûsiyyetü’l-asl Gülbûy nâm câriye semeninden seksen üç buçuk esedî guruş hakkım olup meblağ-ı mezbûru üçümüz bir meclisde iken mezbûr Mehmed’den havâle-i sahîha-i şer‘iyye ile havâle edip mezbûr Mehmed dahi havâle-i mezbûreyi kabûl etmişidi, suâl olunup alıverilmesi matlûbumdur dedikde, gıbbe’s-suâl mezbûr Mehmed cevâbında kaziyye bâlâda tafsîli mürûr ettiği vech üzre cihet-i havâleden müdde‘î-i mezbûra seksen üç buçuk esedî guruş zimmetimde vâcibü’l-edâ ve lâzımü’l-kazâ deynimdir deyû bi tav‘ihî ikrâr etmeğin mûcebince meblağ-ı mezbûr seksen üç buçuk esedî guruşu müdde‘î-i mezbûra edâya ve teslîme merkūm Mehmed’e tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene 1077. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, Resul b. Rıdvan, İbrahim b. Mehmed.