Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 147 Hüküm no: 95 Orijinal metin no: [13a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir grup Ermeni’nin Nişancı mahallesindeki Meryem Ana Kilisesi’nde, Kudüs’teki rahipler için para toplayan vekili darbettikleri Mahmiye-i İstanbul’da Kumkapı kurbunda Nişancı mahallesinde sâkin işbu bâ‘isü’l-kitâb Kestostor v. Baronak nâm Ermeni Dîvân-ı hümâyûn-ı sa‘âdet-makrûnda akd olunan meclis-i şer‘-i hatîrde mahalle-i mezbûrede Sütçüoğlu Asvador ve Parmaksız Asvador ve Reisoğlu Ponyad nâm Ermeniler muvâcehelerinde üzerlerine da‘vâ edip ben medîne-i Kudüs-i şerîf’de olan râhiblerimiz taraflarından mahalle-i mezbûrede vâki‘ Meryem Ana Kilisesi demekle ma‘rûf kilisemizde tâifemizin verdikleri akçeleri cem‘ ve irsâle vekîl olmağla ol kilisede husûs-ı mezbûr için oturur iken mezbûrlar bi’d-defe‘ât gelip bana şütûm-ı galîza ile şetm-i kabîha şekāvet eylediklerinden mâ‘adâ târih-i kitâbdan on gün mukaddem zikr olunan kiliseye gelip bilâ-vech-i şer‘î yumruk ve tabanca ile muhkem beni darb edip ve üzerimde olan esvâbımı yırtmışlardır, suâl olunup mûcebi icrâ olunmak murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mütebeyyine beyyine taleb olundukda mahalle-i mezkûre sükkânından kuyumcu Toros v. Bedros ve Ronik v. Şadi ve kuyumcu Aci Kurd v. Bahtiyar ve Abraham v. Asvador nâm Ermeniler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ târih-i mezbûrda merkūmûn Sütçüoğlu Asvador ve Parmaksız Asvador ve Reisoğlu Ponyad ol kiliseye gelip bizim huzûrumuzda bilâ-vech müdde‘î-i mezbûr Kestostor’u yumruk ve tabanca ile muhkem darb edip ve üzerinde olan esvâbını yırttılar, bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâbi‘ min Cumâdelûlâ li sene seb‘a ve seb‘în ve elf. Şuhûdü’l-hâl: Umdetü’l-a‘yân İsmail Ağa b. ( ) Ser-çavûşân, Şaban Ağa b. Süleyman Ser-muhzırân, Ali Beşe b. Abdullah, Abdullah b. Hamza ve gayruhüm.