Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 148 Hüküm no: 96 Orijinal metin no: [13a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Ebûbekir’in Mustafa Bey b. Mehmed’den muhâlaa yoluyla boşandığı Mahmiye-i İstanbul’da Derviş Ali mahallesinde sâkine Rahime bt. Ebûbekir nâm hâtun meclis-i şer‘-i hatîr-i lâzımü’t-tevkīrde zevci Mustafa Bey b. Mehmed nâm kimesne tarafından hul‘-ı âti’l-beyânı tasdîka vekîl olup es-Seyyid Receb Çelebi b. Musa ve Halil Çelebi b. İbrahim şehâdetleri ile şer‘an vekâleti sâbite olan Mehmed Efendi b. Mustafa nâm kimesne mahzarında ikrâr ve takrîr-i kelâm edip zevcim müvekkil-i merkūm Mustafa Bey zimmetinde mütekarrir ve ma‘kūdun-aleyh olan altı bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim müvekkil-i mezbûr Mustafa Bey ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden [sonra] zevciyyete ve gayra müte‘allika âmme-i de‘âvâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-âşir min Cumâdelûlâ li sene seb‘a ve seb‘în ve elf. Şuhûdü’l-hâl: Mustafa Çelebi b. el-Hâc Ahmed, Şükrullah Bey b. Mustafa, Abdi Çelebi b. Hüseyin, Mustafa b. Abdi Çelebi, Resul b. Rıdvan, Mehmed b. Ramazan ve gayruhüm.