Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 149 Hüküm no: 98 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ebûbekir’in vakfa borcu için evinin satışının vekili tarafından gerçekleştirildiği ve borcun ödendiği Efendi hazretleri imzâsıyla Dârü’l-hilâfeti’l-aliyye Kostantıniyye el-mahmiyye’de el-Hâc Hamza mahallesi sükkânından Mehmed Çelebi b. Ebûbekir nâm kimesne tarafından menzil-i câi’z-zikri semen-i misli ile bey‘a ve semenini kabz ettikden sonra mahmiye-i mezbûrede merhûm el-Hâc İbrahim vakfı’na deyni olan sekiz yüz altmış kıt‘a esedî guruşu vakf-ı mezbûrun mütevellîsi hâzır bi’l-meclis diğer Mehmed Çelebi b. Kenan’a edâ ve teslîme ve meblağ-ı bâkīyi kendiye îsâle azl ve in‘izâlden elden masûne vekâlet-i devriye ile vekîl olup mahmiye-i mahkiyede Koca Mustafa Paşa mahallesinde sâkin müezzin Mehmed Halîfe b. Mazlum ve Sancakdâr Hayreddin mahallesi sükkânından Mustafa b. Ali ve İbrahim Çelebi b. Hasan ve Ömer b. Ali nâm kimesneler şehâdetleri ile mahzar-ı hasm-ı câhidde şer‘an vekâleti sâbite olan el-Hâc Hasan b. Mustafa nâm kimesne, meclis-i şer‘-i hatîr-i lâzımü’t-tevkīrde işbu sâhibü’l-kitâb Mahmud Ağa b. Mehmed tarafından menzil-i âti’l-beyânı iştirâ ve def‘-i semene vekîl olup Hüseyin Bey b. Hasan ve Mustafa b. Ahmed nâm kimesneler şehâdetleri ile şer‘an vekâleti sâbite olan el-Hâc Ramazan b. Abdullah nâm kimesne mahzarında bi’l-vekâle ikrâr ve i‘tirâf edip müvekkil-i mezbûr Mehmed Çelebi b. Ebûbekir’in akd-i âtî sudûruna değin silk-i mülkünde münselik olup zikr olunan el-Hâc Hamza mahallesinde vâki‘ bir tarafdan Melek Hâtun mülkü ve bir tarafdan Ahmed Ağa zevcesi mülkü ve iki tarafdan tarîk-i âm ile mahdûd üç bâb fevkānî beyti ve iki sofa-i ulviyeyi ve iki kenîfi ve iki bâb beyt-i süflîyi ve kileri ve matbahı ve mahtabı ve ahırı ve samanlığı ve üç su kuyusunu müştemil menzil ma‘rifet-i hâkimü’ş-şer‘le nice zamân sûk-ı sultânîde nidâ ve müzâyede olunup rağabât-ı nâs münkatı‘a oldukdan sonra vekîl-i mezbûr el-Hâc Ramazan üzerinde bin yüz kıt‘a esedî guruşda karâr edip ziyâde tâlib-i âhar zuhûr etmemeğin ben dahi vekâlet-i mahkiyem hasebiyle menzil-i mahdûd-ı mezbûru bin yüz kıt‘a esedî guruşa vekîl-i mezbûr el-Hâc Ramazan’a tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi müvekkili mezbûr Mahmud Ağa için bi’l-vekâle iştirâ ve tesellüm eyledikden sonra semeni olan meblağ-ı mezbûr bin yüz kıt‘a esedî guruşu vekîl-i mezbûr Ramazan yedinden tamâmen ahz u kabz edip ba‘dehû ol meblağdan sekiz yüz altmış kıt‘a mezbûrü’n-na‘t guruşu müvekkilim mezbûr Mehmed Çelebi b. Ebûbekir’in cânib-i vakf-ı mezbûra olan deyn-i merkūmu için mütevellî-i mezbûr diğer Mehmed Çelebi b. Kenan’a edâ ve teslîm edip iki yüz kırk kıt‘a guruşu yedimde bâkīdir, ba‘de’l-yevm menzil-i mahdûd-ı mezbûr merkūm Mahmud Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î zeyl-i kitâbda muharrerü’l-esâmî olan müslimînden her biri meblağ-ı mezbûr bin yüz kıt‘a esedî guruşu yevm-i vukū‘-ı bey‘de menzil-i mahdûd-ı mezbûrun semen-i misli olduğunu ihbâr etmeğin mâ vaka‘a bi’t-taleb ketb olundu. Fi’l-yevmi’s-sâmin min Cemâziyelevvel li sene seb‘a ve seb‘în ve elf. Şuhûdü’l-hâl: Osman Bey b. el-Hâc Mehmed, Ali Dede b. Mehmed el-Müezzin, İbrahim b. Ahmed el-Kayyım, Fazlullah Çelebi b. Dilâver, Mehmed Halîfe b. Mustafa, Mustafa b. Ali, İbrahim Çelebi b. ( ), Mehmed b. Ali, Mehmed Çelebi b. Abdurrahman, İbrahim Çelebi b. Mehmed, Şaban Ağa b. ( ) Muhzırbaşı, Mehmed Beşe b. Ali.