Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 150 Hüküm no: 99 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mardiros v. Kirakos’un terekesinin taksimine yapılan itirazın reddi Vilâyet-i Anadolu’da Eğin kazâsına tâbi‘ Apçağa nâm karye ahâlîsinden olup mahmiye-i İstanbul’da Langa Bostanı kurbunda vâki‘ horasancı dükkânında horasancı iken bundan akdem hâlik olan Mardiros v. Kirakos’un sulbiye kızı ve hasren vârisesi olan Eriknaz nâm sagīrenin vasîsi ve kıbel-i şer‘den mansûb vasîsi olan Matyos v. Simaven nâm zimmî meclis-i şer‘-i şerîfde zikri âtî emlâkin cümlesini kendilerin olmak üzre vâzı‘ateyi’l-yed olan bâ‘iseyi’l-kitâb Sahak ve Hobyar veledey Serkis nâm Ermeniler mahzarlarında üzerlerine da‘vâ ve takrîr-i kelâm edip karye-i mezbûre bağları hilâlinde vâki‘ bir tarafdan Kirakos bağı ve bir tarafdan Kurd Ağa bağı ve bir tarafdan Hüseyin bağı ve bir tarafdan dere ile mahdûd bir kıt‘a ve yine karye-i mezbûre kurbunda vâki‘ Hâce bağı demekle ma‘rûf ma‘lûmü’l-hudûd bir kıt‘a mülk bağların cümlesinin ve zikr olunan horasancı dükkânı içinde mevcûd olup kābil-i kısmet olmayan horasancı âlâtının altı sehimden üç sehminin mâliki olup mezbûrân Sahak ve Hobyar’ın cedleri Kirakos v. Agop nâm zimmî zikr olunan bağların nısf-ı müfrezlerini ve âlât-ı mezbûreden hissesinin bir sehmin bin elli yedi senesinde sagīre-i mezbûrenin babası hâlik-i mezbûr Mardiros’a hibe ve teslîm ol dahi ittihâb ve kabûl ve tesellüm edip üç sene mürûr ettikden sonra mezbûr Kirakos zikr olunan bağların nısf müfrezlerini ve âlât-ı mezbûreden hissesinin bir sehmini mezbûrân Sahak ve Hobyar’a ale’s-seviyye hibe ve bağlardan her birinin hissesini ba‘de’l-ifrâz ve eşyâ-i mezbûreyi sâbıkan teslîm anlar dahi ittihâb ve kabûl ve kabz ettiklerinden sonra mezbûr Kirakos bin yetmiş dört Muharremi’nde zikr olunan bağların nısf-ı âharı ve âlât-ı mezbûreden hissesi olan iki sehmi dahi mezbûrân Sahak ve Hobyar[’a] semen-i mezbûra bey‘ ve teslîm anlar dahi iştirâ ve tesellüm ettiklerinden sonra semeninden zimmetlerini ibrâ edip mezbûr Mardiros dahi hâlik olup hissesi sagīre-i mezbûreye intikāl edip sagīre olmağla da‘vâya kādire olma[ma]ğla mezbûrân Sahak ve Hobyar zikr olunan bağlardan sagīre-i mezbûrenin nısf hissesi ile âlât-ı mezbûreden bir sehim hissesine bi gayrı hak vaz‘-ı yed eder, suâl olunup kasr-ı yedlerine tenbîh olunmak matlûbumdur dedikde, gıbbe’s-suâl mezbûrân Sahak ve Hobyar cevâblarında ceddimiz mezbûr Kirakos zikr olunan bağların nısf-ı müfrezlerini ve âlât-ı mezbûreden hissesinin bir sehmini bin altmış senesinde vech-i muharrer üzre bize hibe ve teslîm edip biz dahi ittihâb ve kabûl ve tesellüm eylediğimizden sonra mezbûr Kirakos zikr olunan bağların nısf-ı âharı ile âlât-ı mezbûreden iki sehim hissesini dahi bin yetmiş dört senesinde bize semen-i ma‘lûme bey‘ ve teslîm biz dahi iştirâ ve tesellüm ettiğimizden sonra semeninden zimmetlerimizi ibrâ etmişidi, bizden mukaddem bin elli yedi senesinde sagīre-i mezbûrenin babası hâlik-i mezbûra vech-i muharrer üzre hibe ettiği ma‘lûmumuz değildir dediklerinde, müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Kirakos zikr olunan bağların nısf-ı müfrezleri ile âlât-ı mezbûreden hissesi olan üç sehminin bir sehmini sagīre-i mezbûrenin babaları hâlik-i mezbûr Markos’a bin elli yedi senesinde hibe ve teslîm edip mezbûr Markos dahi ittihâb ve kabûl ettiğini bilmediklerine mezbûrân Sahak ve Hobyar’a yemîn teklîf olundukda anlar dahi yemîn billâhi enzele’l-İncîle alâ İsa aleyhi’s-selâm etmeğin mûcebince müdde‘î-i mezbûr mu‘ârazadan men‘ olunup mâ vaka‘a bi’t-taleb [14a] ketb olundu. Fi’l-yevmi’t-tâsi‘ min Cumâdelûlâ li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Şükrullah Bey b. Mustafa, Abdi Çelebi b. Hüseyin, İbrahim Çelebi b. Ahmed.