Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 157 Hüküm no: 109 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hasan’ın komşusunun arsasına diktiği meyve ağaçlarını sökmesine mani olunmaması Vilâyet-i Rumeli’nde Premedi kazâsına tâbi‘ Pireşne nâm karye ahâlîsinden işbu bâ‘isü’l-kitâb Mustafa b. Hasan nâm kimesne mahfil-i kazâda Mehmed Beşe b. Haydar nâm kimesne mahzarında üzerine da‘vâ ve takrîr-i kelâm edip karye-i mezbûrede vâki‘ bir tarafdan Hasan Beşe mülkü ve bir tarafdan Mehmed Beşe menzili ve bir tarafdan benim menzilim ve bir tarafdan tarîk-i âm ile mahdûd olup mezbûr Mehmed Beşe’nin mülkü olan arsası üzerine nefsim için fuzûlen altı asma ve dört incir ve beş erik ve üç vişne eşcârı gars etmişdim, eşcâr-ı mezbûreyi kal‘ ve ref‘ arsa-i mezbûreye muzır olmamağla kal‘ ve ref‘ murâd ettiğimde mezbûr Mehmed Beşe bi gayrı vechin mâni‘ olur suâl olunup vech-i muharrer üzre mâni‘ olmamak üzre mezbûr Mehmed Beşe’ye suâl olunup tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup karye-i mezbûre ahâlîsinden Mehmed b. Mustafa ve Mustafa b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūm Mehmed Beşe’nin arsa-i mahdûde-i mezbûresi üzerine olan altı asma ve dört incir ve beş erik ve üç vişne eşcârın bizim huzûrumuzda müdde‘î-i mezbûr gars etmişidi, biz bu husûsa bu vech üzre şâhidleriz şehâdet ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olup eşcâr-ı mezbûreyi kal‘ arsa-i mezbûreye muzır olmadığı lede’ş-şer‘i’l-mutahhar zâhir olmağın vech-i muharrer üzre eşcâr-ı mezbûreyi kal‘ ve ref‘a müdde‘î-i mezbûra mâni‘ olmamak üzre mezbûr Mehmed Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin min Cumâdelûlâ li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, Hasan Çelebi b. Mustafa, Şükrullah Bey b. Mustafa, Abdi Çelebi b. Hüseyin.