Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 171 Hüküm no: 263 Orijinal metin no: [28a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todoro v. Nikola’nın tasarrufundaki vakıf tarlayı Hacı Seydî b. Yusuf’a tefvîz ettiği Dârü’s-saltanati’s-seniyye Kostantıniyye el-mahmiyye mahallâtından Mirahor mahallesi sâkinlerinden Todoro v. Nikola nâm zimmî mahfil-i kazâda mahmiye-i mezbûre mahallâtından Arabacı Bayezid mahallesinde sâkin el-Hâc Seydî b. Yusuf nâm kimesne mahzarında takrîr-i kelâm edip havâss-ı mezbûra tâbi‘ Yedikule’de vâki‘ bir cânib-i düstûr-ı mükerrem müşîr-i müfahham müessis-i bünyâni’d-devleti ve’l-ikbâl seyyid-i erkâni’s- sa‘âdeti ve’l-iclâl? Rum beylerbeyisi Mehmed Paşa -yesserallâhu mâ yeşâ- hazretlerinin mülkü ile ve bir cânibi Cerrâhbaşı Emrullah Çelebi mülkü ile ve bir cânibi Solak ( ) tarlasıyla ve bir cânibi tarîk-i âm ile mahdûd olup Fîruz Ağa vakfı’ndan on yedi dönüm mikdârı bir kıt‘a tarlanın [hakk-ı] tasarrufunu evkāf-ı mezbûr mütevellîsi ma‘rifetiyle mezbûr el-Hâc Seydî’ye tefvîz edip ve mezbûrun yedinden iki bin yedi yüz kırk râyic fi’l-vakt akçe alıp kabz ettim deyû ikrâr ve i‘tirâf ettikde [mâ vaka‘a kayd olundu]. Şuhûdü’l-hâl: Şaban [b.] Murad, Abdurrahman [b.] Abdülkādir, Mehmed [b.] Hacı Mustafa, Hacı Lütfi b. Abdullah, Hızır [b.] İslâm