Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 171 Hüküm no: 264 Orijinal metin no: [28a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Çelebi’nin koyunlarını basıp zâyi ettikleri için Terkos ahâlîsinden Danyal ve arkadaşları hakkında açtığı davadan vazgeçtiği Fahrü’l-müderrisîn Mevlânâ Ömer Çelebi Efendi tarafından Mehmed b. Hamza ve Mustafa b. Abdullah nâm kimesneler şehâdetleriyle husûs-ı âti’z-zikre vekâleti sâbite olan İbrahim b. İlyas mahfil-i kazâda Havâss-ı Kostantıniyye müzâfâtından karye-i Terkos ahâlîsinden Danyal v. Yorgi ve Manol v. Yani ve İstemad v. Petro ve Yorgi v. Yani nâm zimmîler ve sâir ahâlî-i karye muvâcehelerinde ikrâr ve i‘tirâf edip bundan akdem mezbûrlar ahâlî-i karyeden Danyal bir iki yoldaşlarıyla müvekkilim mezbûr efendinin koyunun basıp bir mikdâr koyunu zâyi‘ oldu deyû da‘vâ etmiş idi. Hâlen mesfûrûn ahâlî ile umûmen ve mezbûr Danyal ve Manol ve İstemad ve Yorgi nâm kimesneler ile husûsan da‘vâ ve talebimiz yokdur, min ba‘d müvekkilim Ömer Efendi veya vekîl-i şer‘îsinden da‘vâ ve taleb olursa inde’l-hükkâm mesmû‘a olmaya dedikde mukırr-ı mezbûrun ikrâr-ı meşrûhların mukarrun [lehümü’l]-mezbûrûn vicâhen ve şifâhen tahkīk ve tasdîk edip mâ vaka‘a bi’t-taleb kayd şüd. Fî târihihî. Şuhûdü’l-hâl: El-Hâc Abdi b. Yusuf, Derviş b. Sofu, Yakub b. Mehmed, Ali Kethüdâ b. Abdullah, diğer Ali b. Abdullah, Bâli b. Hüseyin, Mustafa b. Yusuf ve gayr