Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 172 Hüküm no: 265 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evinde kalpazanlık yaptığı tespit edilip kaçan Mahmud’un satılan eşyalarının bedelinin Eyüp Vakfı’na teslim edildiği Dergâh-ı sa‘âdet-penâh -eyyedallâhu te‘âlâ ve kavvâhü- çavuşlarından umdetü’l-emâcid ve’l-ekârim Mustafa Çavuş mahfil-i kazâda bi’l-fi‘l Hazret-i Ebâ Eyyûb el-Ensârî -aleyhi rıdvânü’l-meliki’l-Bârî- evkāfı’na mütevellî olan bâ‘is-i tahrîr-i kitâb kıdvetü’l-emâsil ve’l-akrân Ferruh Bey b. Abdullah mahzarında ikrâr ve takrîr-i merâm edip medîne-i Ebâ Eyyûb el-Ensârî -aleyhi rıdvânü’l-meliki’l-Bârî- mahallâtından Çavuş Kasım mahallesinde mülk evi olup sâbıkan evinde sikkeler ve kallâb âlâtını bulunup gāib olan Mahmud nâm kallâbın mevcûd olan esbâbı tahrîr olunsun deyû sâbıkan fermân olunup ve husûs-ı mezkûra Ebûbekir nâm çavuş mübâşir ta‘yîn olunup mukaddemâ üzerine kıbel-i şer‘den varılıp evinde bulunan esbâbı tahrîr olunup yine medîne-i merkūme mahallâtından Câmi‘-i şerîf mahallesi sâkinlerinden Ahmed Çelebi nâm kimesneye emânet vaz‘ etmişler idi. Hâlen zikr olunan esbâbını bey‘ edip akçesini mîrî zabt etmesini bana fermân olunmuş idi ve lâkin evkāf-ı mezbûr min külli’l-vücûh serbesti olup beytülmâl-i âmme ve hâssa ve mâl-ı gāib kadîmü’l-eyyâmdan evkāf-ı mezbûreye zabt olunmağın zikr olunan esbâbları düstûr-ı mükerrem müşîr-i müfahham müşeyyid-i bünyânü’l-lütfi ve’l-kerem nâzım-ı nizâm-ı âlem muslih-ı mesâlih-i benî âdem sâhibü’l-izzi ve’l-iclâl sâhib-i ezyâli’l-mecdi ve’l-ikbâl nâmus-ı esrâri’s-saltanati’z-zâhire kāmûs-ı bihâri’l-hilâfeti’l-bâhire es-sâhibü’l-efham ve’l-iz vezîrü’l-a‘zam Hazret-i Mesih Paşa -yesserallâhu mâ yeşâ- hazretlerinin fermân-ı âlîleri üzre mütevellî-i müşârün-ileyhe kalîl ve kesîr her ne ise teslîm eyledim dedikde mukırr-ı merkūmu akvâl-i meşrûhasında mütevellî-i mûmâ-ileyh vicâhen ve şifâhen tasdîk ve tahkīk eyledikde ve zikr olunan esbâbları müşârün-ileyh çavuşdan tesellüm eylediğine mukır ve mu‘terif oldukda mâ vaka‘a vukū‘u üzre gıbbe’t-taleb kayd olundu. Şuhûdü’l-hâl: Ferruh Bey b. Abdullah el-Cündî, Mehmed b. Abdullah, Ali b. Abdullah el-Cündî, Hüseyin Halîfe b. Yusuf, Derviş Mehmed b. Ramazan, Ali b. Abdullah el-Attâr, Abdi b. Hüseyin, Ramazan b. Mehmed, Ramazan [b.] Abdullah, Mustafa b. Abdülkerim