Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 191 Hüküm no: 300 Orijinal metin no: [32b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail b. Abdullah’ın evinden çalındığını iddia ettiği eşyalarının Kara Ali b. Abdullah’ın evinde bulunduğu İsmail b. Abdullah nâm kimesne mahfil-i kazâda medîne-i Ebâ Eyyûb el-Ensârî mahallâtından Nişancı mahallesinde sâkin Kara Ali b. Abdullah mahzarında takrîr-i kelâm edip işbu Rebî‘ulevvelin 23’üncü gecesi odam açılıp bir acemî perde ve bir kırmızı çakşır ve bir acemî yastık yüzü ve bir beyaz hamam döşemesi ve bir diz çakşırı ve bir ocak perdesi ve bir altınlı acemî arakiyyem zâyi‘ olup ve mezbûr Kara Ali’yi mazanna ittihâz eylediğim ecilden kıbel-i şer‘den üzerine varıp görülmesin taleb ederim dedikde zeyl-i kitâbda esâmîsi mastûr olan müslümanlar ile kıbel-i şer‘den âdem irsâl olunup ve zikr olunan yastık yüzü dahi merkūm Kara Ali’nin zevcesi Fâtıma bt. Mehmed nâm hâtunun koynunda bulunduğundan gelip haber verdiklerinde keyfiyyet-i hâl mesfûr Kara Ali’den dahi suâl olundukda fi’l-vâki‘ zikr olunan esbâblar benim evimde vech-i meşrûh üzre bulundu lâkin mezkûr İsmail âhiret karındaşımdır ekser-i zamânda evime gelir gider hattâ bu gece yine bizde idi zikr olunan esbâbı kendi getirip evime bırakdı zan ederin deyû cevâb verip ve merkūm İsmail dahi ol gece anda yattım [deyû] mukır ve mu‘terif oldukdan sonra mâ vaka‘a bi’t-taleb kayd olundu. Şuhûdü’l-hâl: Mustafa b. Abdi, Mehmed b. Ali, İlyas Bey [b.] Abdullah, Mehmed [b.] Haydar, Bâli [b.] Hüseyin, Kurd Bey [b.] Hüsrev, Hasan [b.] Abdullah, İskender b. Abdülmennân, Mustafa [b.] Mehmed