Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 197 Hüküm no: 310 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Abdi Çelebi’nin evinin borçlarının ödenmesi için mirasçıları tarafından müzâyede ile Ahmed Ağa b. Abdülmennân’a satıldığı [Medîne-i Ebâ Eyyûb el-Ensârî -aleyhi] rıdvânü’l-meliki’l-Bârî- mahallâtından Abdi Çelebi mahallesi sâkinlerinden sâbıkan fevt olan Abdi Çelebi’nin sulbî oğlu Mustafa asâleten ve sagīr karındaşı Mehmed’e kıbel-i şer‘den vasî nasb olunan Aydın Bey kıbelinden ikrâr-ı âti’z-zikre nehc-i şer‘î üzre vekâleti sâbite olan Mahmud b. Abdullah vekâleten husûs-ı âti’z-zikri tasdîke hâlâ Cebecibaşı olan kıdvetü erbâbi’l-ikbâl zübdetü ashâbi’l-iclâl zü’l-mecdi’r-râsih ve’ş-şerefi’ş-şâmih el-muhtas bi-mezîdi inâyeti’l-meliki’l-hannân Ahmed Ağa b. Abdülmennân kıbelinden nehc-i şer‘î üzre [vekâleti] sâbite olan bâ‘is-i tahrîr-i kitâb İlyas Çelebi b. Hüseyin mahzarında mahfil-i kazâ ve mahall-i irtizâda ikrâr-ı sahîh-i şer‘î ve i‘tirâf-ı sarîh-i mer‘î kılıp müteveffâ-yı mezbûrdan sagīr-i merkūm ile mezbûr karındaşına irs ile intikāl eden mahalle-i mezbûrede vâki‘ bir cânibi Hamza b. Abdullah mülküne ve bir cânibi Ferhad Bey vakfı’na ve bir cânibi Yasemin bt. Abdullah mülküne ve bir cânibi mezbûr Abdi Çelebi mescidine müntehî olup iki beyt-i ulvîyi ve bir hücreyi müştemil olan menzil müteveffâ-yı merkūmun zarûret-i deyni için sûk-ı sultânîde mirâren mezâd olundukda müvekkil-i müşârün-ileyhin üzerinde yirmi sekiz bin akçeye karâr edip ziyâde ile tâlib ve râgıb olmadığı ecilden zikr olunan menzili cemî‘ tevâbi‘ ve levâhıkı ile mûmâ-ileyh Ahmed Ağa’ya yirmi sekiz bin akçeye bey‘-i bât ile bey‘ edip kabz-ı semen ve teslîm-i mebî‘ eyledik dediklerinde mukırrân-ı merkūmânı akvâl-i meşrûhalarında vekîl-i mûmâ-ileyh vicâhen ve şifâhen tasdîk eyledikde menzil-i mezbûrun derkine zikr olunan mahalleden Ahmed b. Mehmed ve Mehmed b. Ahmed nâm kimesneler mezbûrların emirleri ile kefîl olduklarında mâ vaka‘a vukū‘u üzre gıbbe’t-taleb kayd olundu. Tahrîren fî evâhiri Saferi’l-hayr min şuhûri seneti erba‘a ve tis‘în ve tis‘a mi’e. Şuhûdü’l-hâl: Mehmed Halîfe b. Hüseyin el-İmâm, Sefer Halîfe b. Mehmed el-İmâm, Ahmed Halîfe b. Ali el-İmâm, kıdvetü’l-emâsil ve’l-akrân Bahşî Çavuş b. Yusuf, Abdülkerim b. Hüseyin el-Hatîb, es-Seyyid Ali b. es-Seyyid Mahmud, es-Seyyid Hamza b. es-Seyyid Mustafa, Hamza b. Abdullah, Sinan b. Abdullah, Mehmed b. Abdullah ve gayruhüm