Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 200 Hüküm no: 312 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebecibaşı Ahmed Ağa vakfı tasarrufundaki Sultan Bayezid Evkâfı arâzisinden iki evlek yerin Seyyid Abdülkâdir b. Seyyid Mehmed Efendi’ye altmış yıllığına kiralandığı Kıdvetü erbâbi’l-ikbâl umdetü ashâbi’l-iclâl mecma‘u’l-me’âsir ve’l-mekârim mefharü’l-ekâbir ve’l-ekârim el-muhtas bi-mezîdi inâyeti’l-meliki’l-mennân hâlâ cebeciler ağası olan Ahmed Ağa b. Abdülmennân hazretlerinin evkāfına mütevellî olan zü’l-izzi’l-emced Mustafa Bey b. Ahmed meclis-i şer‘-i şerîfe hâzır olup sadr-ı kitâbı muvakki‘ olan hâkim-i mûmâ-ileyh -esbağallâhu ni‘amehû aleyh- mahzarında takrîr-i kelâm edip mahrûse-i İstanbul ebvâbından Eğrikapı hâricinde cennet-mekân firdevs-âşiyân merhûm ve mağfûrun-leh Sultan Bayezid Hân -aleyhi’r-rahmetü ve’r-rıdvân- hazretlerinin evkāfına (…..) arâziden yılda yüz kırk sekiz akçe mukāta‘a-i mu‘ayyenesi olan sâha-i? mübeyyene? üzre olan ebniye ve arsa-i hâliyesinin hakk-ı? karârı mûmâ-ileyh cebecibaşı hazretlerinin yedinde ve tasarrufunda olup müslümanlara evlek evlek tevzî‘ olunması murâd olundukda zikr olan arâzi-i hâliyeden bir cânibi Seyyid Hasan Çelebi yerine ve bir cânibi Musa nâm saka yerine ve bir cânibi tarîk-i âma ve bir tarafı zikr olan arz-ı hâliyeye muttasıl ve müntehî tûlen altmış zirâ‘ ve arzan elli zirâ‘ iki evlek yeri târih-i kitâb şehrinin gurresinden altmış yıl tamâmına varınca icâre-i tavîleyi tecvîz eden fukahâ-i üli’l-elbâb kavilleri üzre tecdîd-i müte‘âkideyne muhtâc olmaksızın her üç yılda bir akd-i cedîd olup akd-i evvelin intihâsı akd-i sânînin ibtidâsı olmak üzre mecâlis-i müte‘addidede mütevâliyeten yirmi akd ile işbu sâhibü’s-sicil kıdvetü’l-ulemâ’i’l-muhakkikīn umdetü’l-fuzalâ’i’l-müdakkikīn şerîfü’n-neseb latîfü’l-haseb es-Seyyid Abdülkādir b. el-merhûm ve’l-mağfûru leh es-Seyyid Mehmed Efendi’ye dört bin altı yüz akçe mukāta‘aya verip anlar dahi kabûl eyleyip dört bin akçesin mu‘accelen alıp altı yüz akçesin sâl-be-sâl onar akçe vermek şart eyleyip ba‘de’l-yevm her sene âhirinde lâzım olan onar akçe mukāta‘asın müşârün-ileyh cebecibaşının mütevellîsine verip edâ ede zikr olan yeri ba‘de yevminâ hâzâ keyfe mâ yeşâ ve yahtâr mutasarrıf ola dedikde mukarrun lehü’l-mezbûr cânibinden tasdîke vekîl olan Hüseyin b. Abdullah mukırr-ı merkūmu ikrâr-ı meşrûhunda vicâhen ve şifâhen tasdîk edip işbu hurûf ber sebîl-i temessük ketb olunup yed-i tâlibe verildi ki vakt-i istizhârda izhâr eyleye. Tahrîren fi’l-yevmi’l-hâdî aşer [min] şehri Ramazâni’l-mübârek li sene erba‘a ve tis‘în ve tis‘a mi’e. Şuhûdü’l-hâl: Resûl b. Muharrem el-İmâm, Veli b. Nebi el-Müezzin, Hasan Çelebi b. Abdüllatîf el-Müderris, Rüstem b. Abdullah, Seyyid Hasan Çelebi, Hüseyin b. Abdullah, Mehmed b. Abdullah, İbrahim b. Abdullah, muharrirü’l-hurûf Mehmed el-Muhzır