Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 217 Hüküm no: 344 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Hüseyin ile kız kardeşi Râziye bt. Hüseyin’in babalarından intikal eden evi aralarında taksîm ettikleri Medîne-i Hazret-i Ebâ Eyyûb el-Ensârî -razıye anhü rabbühü’l-Bârî-’de Süleyman Subaşı mahallesinde bundan akdem fevt olan (...) kimesnenin sulbî oğlu Ali nâm kimesne meclis-i şer‘-i şerîf-i Nebevî’de işbu hâfızatü’l-kitâb li-ebeveyn kız karındaşı Râziye nâm hâtun [mahzarında] takrîr-i kelâm edip babamız mezkûr Hüseyin fevt oldukda muhallefâtından mahalle-i merkūmede bir tarafı Saraylı demekle [ma‘rûfe] Şemsi bt. Abdullah ( ) ve bir cânibi Âişe bt. Behram nâm hâtunun mülkleri ve iki tarafı tarîk-i âm ile mahdûd olup (...) iç avlu bir büyük (...) evi ve bir küçük oda ve kenîfi ve zulleyi müştemil ve taşrasında bir süflî evi ve sundurmayı muhtevî bir menzili li’z-zekeri hazzi’l-[ünseyeyn] üzre ikimize kalmış idi el-hâletü hâzihî ikimizin ittifâk ve rızâsı ve ehl-i vukūf ta‘yîni ile li’z-zekeri mislü hazzi’l-ünseyeyn üzre mahdûd-ı mezkûrdan mezbûr Saraylı Hâtun cânibinde olan küçük oda ve kenîfi ile tarîk-i âmdan cânibe iki zirâ‘ yerini hudûd ve hukūkuyla nişân edip merkūme kız karındaşım Râziye’ye verdim min ba‘d mülkü ve hakkı olup bi-vechin mine’l-vücûh da‘vâ ve nizâ‘ım yokdur dedikde mezbûre Râziye karındaşı mesfûr Ali’nin kelâmı (...) vicâhen kabûl ve tasdîk eyleyip benim dahi karındaşıma kalan menzilde alâka ve nizâ‘ım yokdur dedikde müzekkir-i mâ cerâ olmak için bu vesîka-i enîka alâ mâ hüve’l-hakīka ketb ve imlâ olunup tâlibeyn yedine i‘tâ olundu. Tahrîren fî 10 R(...) Şuhûdü’l-hâl: Hızır Halîfe b. Abdülmuhsin el-İmâm, Hasan Dede b. Celal el-Müezzin, Timur Bey b. Abdullah, Mehmed b. Abdülbâkī, Murad b. Abdullah, Mehmed b. Hüseyin, Sefer b. İsmail, Derviş b. Mehmed, Ramazan b. Hasan, Mehmed b. Ali, Ramazan b. Hasan, Abdi b. Ali, (…)