Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 63 Hüküm no: 6 Orijinal metin no: [2b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mitro v. Todori’nin menzilinin Râbia bt. Ahmed Ağa’ya satılması Kazâ-i Havâss-ı Aliyye müzâfâtından Küçükçekmece’ye tâbi‘ Nakkāşköy demekle ma‘rûf karye sâkinlerinden iken hâlik olan Mitro v. Todori nâm zimmînin verâseti, sulbî sagīr oğlu Mihal’e ve zevce-i metrûkesi olup sagīr-i mezbûrun kıbel-i şer‘den mansûbe vasîsi ve vâlidesi Laskarina bt. Aleksi’ye münhasıra oldukdan sonra asâleten [ve] vesâyeten meclis-i şer‘-i hatîr-i lâzımü’t-tevkīrde işbu hâmiletü’l-kitâb hâlâ Habeş Beylerbeyisi olan İskender Paşa hazretlerinin hâtunu olan Râbia Hâtun bt. Ahmed Ağa tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında Mehmed b. Ömer ve Mahmud b. Pîrî nâm kimesneler şehâdetleri ile şer‘an sâbite olan fahrü’l-akrân Osman Bey b. Abdullah es-Sarrâcü’s-sultânî mahzarında bi’l-asâle ve’l-vekâle ikrâr ve takrîr-i kelâm edip karye-i merkūmede vâki‘ üç tarafdan müvekkile-i mûmâ-ileyhâ hazretlerinin silk-i mülk-i sahîhlerinde münselik ve münharıt olan menzile ve bir tarafdan tarîk-i âma müntehî ve mahdûd olup bir tahtânî beyti ve zât-ı eşcâr-ı müsmire ve gayr-ı müsmireyi hâvî mülk menzil-i mevrûsumuzu cümle-i tevâbi‘ ve levâhıkı ve kâffe-i menâfi‘ ve merâfıkı hâlik-i mezbûrun ba‘de’l-isbât zarûret-i deyni ve sagīr-i mezbûr Mihal’in zarûret-i nafakası için vesâyet-i mahkiyem hasebiyle müvekkile-i müşârün-ileyhâya üç bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen eylediğimden sonra yine karye-i merkūme kurbunda vâki‘ hâlik-i merkūm Mitro’nun hâl-i hayâtında taht-ı tasarrufunda olup ba‘de helâkihî tahte’l-kānûn hakk-ı tasarrufu sagīr-i merkūma intikāl eden arâziden olup tahmînen altı keyl tohum istî‘âb eder her yeri inde ahâliyi’d-diyâr ma‘lûmü’l-hudûd ve’l-mikdâr olan mevâzi‘-i müteferrikada vâki‘ üç kıt‘a tarlanın dahi hakk-ı tasarrufunu sâhib-i arz ma‘rifetiyle müvekkile-i müşârün-ileyhâ hazretlerine tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan beş yüz nakd-i mezbûrü’n-na‘t akçeyi vesâyeti hasebiyle hâlik-i merkūm Mitro’nun zarûret-i deynini edâ ve îfâ ve sagīr-i mezbûrun infâk ve iksâsı için müvekkile-i mûmâ-ileyhâ Râbia Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd müşârün-ileyhâ Râbia Hâtun’un mülk-i müşterâ-yı sarîhidir ve mârrü’z-zikr üç kıt‘a tarlanın dahi hakk-ı tasarrufu müvekkile-i müşârün-ileyhâ hazretlerinindir sâir emsâli tasarrufu gibi mutasarrıfe olsun dedikde mukırra-i mezbûrenin vech-i meşrûh üzre cârî olan ikrâr ve takrîrin vekîl-i mezbûr Osman Bey bi’l-vekâle tasdîk edicek mâ hüve’l-vâki‘ bi’t-taleb ketb ve imlâ ve tahrîr ve inşâ olundu. Hurrire fi’l-yevmi’s-sâmin aşer min Muharremi’l-harâm li sene tis‘a ve ışrîn ve elf. Şuhûdü’l-hâl: Keyvan Bey b. Abdullah es-Sarrâcü’s-sultânî, Mahmud b. Pîrî, Mehmed b. Abdullah, Mehmed b. Ahmed, Hasan Bey b. Abdullah el-Cündî Osman Çelebi b. Ahmed el-Müezzin, Mustafa b. Mehmed, Perviz b. Abdullah, Ali b. Hamdullah, Yakub b. Kurd, Mehmed b. Hanefi, Süleyman b. Turgud.