Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 68 Hüküm no: 12 Orijinal metin no: [3b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Seyyid Mustafa’nın Merkez Efendi mahallesindeki evini Ramazan Çavuş b. Yahya’ya sattığı Dârü’s-saltanati’s-seniyye mahmiye-i Kostantıniyye sur kapılarından Yenikapı hâricinde vâki‘ merhûm Şeyh Merkez Efendi -kuddise sırruhû- mahallesinde sâkine olan Meryem bt. Seyyid Mustafa nâm hâtun kıbelinden âtiyyü’z-zikr bey‘ ikrârına vekâleti müvekkile-i mezbûreyi ma‘rifet-i şer‘iyye ile tanıyan müezzin Ali b. Kurd ve kayyım Mustafa b. İskender nâm kimesnelerin şehâdetleri ile sâbit olan imâm Ali Efendi b. Ahmed nâm kimesne, meclis-i şer‘-i şerîfde -sânehallâhu te‘âlâ ani’t-tağyîr ve’t-tahrîf- şöyle ikrâr ve i‘tirâf etti ki, müvekkile-i merkūme cemî‘-i menzilini hâmil-i hâze’l-kitâb fahrü’l-emâcid ve’l-ekârim Ramazan Çavuş b. Yahya’ya satmışdır. O da işbu akdin kendilerinden sudûruna kadar mahalle-i mezbûrede vâki‘ müvekkile-i mezbûrenin sâhibi ve mâliki olduğu elinde ve taht-ı tasarrufunda bulundurduğu bir tarafdan a‘lemü’l-ulemâ’i’l-izâm efdalü’l-fuzalâi’l-kirâm Yahya Efendi b. merhûm Zekeriya Efendi mülkü, diğer tarafdan merhûm Merkez Efendi câmi‘-i bitişiğindeki odalar, öbür tarafdan mekābir-i müslimîn ve diğer tarafdan da tarîk-i âm ile mahdûd olan ve tahtânî iki beyti, iki selâmlığı, ahırı, su kuyusunu, helâyı ve eşcâr-ı müsmire ve gayr-ı müsmireli havluyu hâvî menzil-i mezbûru cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yirmi beş bin akçe-i Osmânî semen-i mu‘ayyen-i makbûz ile andan iştirâ etti îcâb ve kabûlü, teslîm ve tesellümü hâvî bey‘-i bât ile akid tamâm oldu. Müşterî-i mûmâ-ileyh vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’s-sâbi‘ ve’l-ışrîn min Muharremi’l-harâm sene tis‘a ve ışrîn ba‘de’l-elf. Şuhûdü’l-hâl: es-Seyyid Mahmud b. es-Seyyid Ali, Zülfikār Efendi b. Şehsuvar, Abdi Çelebi b. Şeyh Mustafa, İbrahim Halîfe b. Burhan el-İmâm, Receb b. Osman el-Müezzin, Ali b. Mustafa er-Râcil, Hüseyin Bey b. Abdullah el-Cündî Mehmed b. Abdullah el-Cündî Rıdvan Bey b. Abdullah el-Cündî Mustafa b. Mehmed, Mehmed b. Hanefi, Ali b. Abdullah, Yakub b. Kurd ve gayruhüm mine’l-hâzırîn.