Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 73 Hüküm no: 20 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. İlyas’ın bazı emlâk, hayvan ve eşyasını Ahmed Ağa b. Abdullah’a satması Mahmiye-i Kostantıniyye -suniyet ani’l-âfât ve’l-beliyye- mahallâtından Sofular mahallesi sâkinlerinden Emine Hâtun bt. İlyas meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb fahrü’l-emâsil ve’l-ekârim zübdetü’l-mefâhim ve’l-mekârim Ahmed Ağa b. Abdullah Subaşı nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip işbu akdin sudûruna değin silk-i mülk-i sahîhimde münselik ve münharıt olan emlâkden olup kazâ-i Havâss-ı Aliyye müzâfâtından Çatalca nâhiyesine tâbi‘ Subaşıköyü demekle ma‘rûf karyede vâki‘ lede’l-ahâlî ma‘lûmü’l-hudûd olup muhavvataynı müştemil muhavvata-i dâhiliyyesi bir taş duvarıyla binâ olunmuş beyti ve kezâlik diğer tuğla ile mübtenî beyti ve samanlığı ve altı bâb çatma büyût-ı müte‘addideyi ve muhavvata-i hâriciyyesi bir ahırı ve bir odayı ve bir sofayı ve bir sundurmayı ve iki anbarı müştemil çiftlik demek ile ma‘rûf mülk menzilimi ve karye-i merkūme sınırı dâhilinde vâki‘ her biri lede’l-ahâlî ma‘lûmü’l-hudûd iki kıt‘a mülk bağımı ve yine karye-i mezbûre kurbunda lede’l-ahâlî ve’l-cîrân iki kıt‘a mülk yurd yerimi ve çiftlik-i merkūmede iki re’s su sığırı öküzü ve iki re’s kara sığır öküzünü ve dört re’s su sığırı ineğini ve iki re’s kara sığır ineğini ve iki re’s kara sığır buzağısını ve çiftlik-i mezkûrda sâkin Kasım b. Abdullah nâm kimesne ile ber vech-i iştirâk sülüsü anın ve sülüsânı benim olmak üzre buğday ve alefden bana isâbet eden mahsûlü ve beynimizde ilm-i şer‘ birle ma‘lûm olan âlât ve zirâ‘ati ve eşyâ-i hırâseti cümle-i tevâbi‘ ve levâhıkı ve kâffe-i menâfi‘ ve merâfıkları ile bi safkatin vâhidetin mûmâ-ileyh Ahmed Ağa’ya altmış bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip ve kabz-ı semen-i ma‘dûd ve teslîm-i mebî‘ât-ı mahdûde kıldığımdan sonra yine karye-i merkūme sınırında vâki‘ üç kıt‘a çayırın ve yine Oklağalı demekle ma‘rûf karye kurbunda hudûdu ma‘lûm iki kıt‘a çayırın ve zikr olunan karyeler vasatında vâki‘ lede’l-ahâlî ma‘lûmü’l-hudûd iki kıt‘a çayırın sâlifü’l-beyân çiftlik ile tasarruf olunup mevâzi‘-i müteferrikada vâki‘ her biri inde ahâliyi’d-diyâr ma‘lûmü’l-hudûd ve’l-mikdâr tahmînen yirmi sekiz müd tohum istî‘âb eder mutasarrıfe olduğum ( ) kıt‘a tarlaların dahi hakk-ı tasarrufunu sâhib-i arz ma‘rifetiyle müşârün-ileyh Ahmed Ağa’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan on bin nakd-i fıddî-i Osmânî râyic fi’l-vakt akçeyi mûmâ-ileyh Ahmed Ağa yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân emlâk mûmâ-ileyh Ahmed Ağa’nın mülk-i müşterâ-yı sarîhidir ve mârrü’z-zikr çayırların ve arâzinin dahi hakk-ı tasarrufu mersûmundur sâir emsâli tasarrufları gibi mutasarrıf olsun dedikde mukırra-i merkūmenin vech-i meşrûh üzre cârî olan ikrâr ve takrîrin el-mukarru lehü’l-mezbûr Ahmed Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ ve tahrîr ve inşâ olunup yed-i tâlibe def‘ ve vaz‘ olundu lede’l-hâce ibrâz ve ihticâc edine. Hurrire fi’l-yevmi’s-sâlis ve’l-ışrîn min Muharremi’l-harâm li sene tis‘a ve ışrîn ve elf. Şuhûdü’l-hâl: es-Sâbıkūn.